Avropadan fərqli Türkiyədə bu yayın transfer dönəmi sentyabrın 15-də bağlanacaq. Ona görə də Türkiyə klubları heyəti gücləndirməkdə davam edirlər.

“Beşiktaş”dan sürpriz transfer xəbəri də gəldi. Belə ki, İstanbul nəhəngi təcrübəli yarımmüdafiəçi, sabiq oyunçusu Gökhan İnlərlə anlaşma əldə etdi. Müqavilə birilliyə nəzərdə tutulub.

Gökhanın 39 yaşı olduğunu nəzərə alsaq, ilk baxışdan bu transfer qəribə görünür. Amma “Qartal”ın İnlərlə bağlı fərqli planı var. Gələn yay Gökhan karyerasını başa vuracaq. Onun vida oyunu “Beşiktaş”la “Napoli” arasında keçiriləcək. Bundan sonra isə Gökhan İnlər “Beşiktaş”da idman direktoru kimi fəaliyyətə başlayacaq! Türkəsilli isveçrəli futbolçu artıq UEFA-nın MİP (Master of İnternational Players) proqramına qəbul olunub. O, bu proqramı bitirəndən sonra idman direktoru kimi çalışmaq arzusundadı. “Dəmirörən Xəbər Ajansı”na açıqlamalar verən tanınmış futbolçu bunları deyib:

Qeyd edək ki, 2006-cı ildə Türkiyənin U-21 yığmasının heyətində oynamasına rəğmən, Türkiyənin əsas komandasından təklif almayan Gökhan doğulduğu ölkənin, yəni İsveçrənin şərəfini qorumağa qərar vermişdi. O, 2006-15-ci illərdə İsveçrənin heyətində 89 oyuna çıxaraq 7 dəfə fərqlənib. Gökhanın klub karyerası daha parlaq alınıb. O, “Udineze”, “Napoli”, “Lester”, “Beşiktaş”, “İstanbul BŞ”nin şərəfini qoruyub. 2020-ci ildən bu yana isə “Adana Dəmirspor”un uğurları üçün tər tökürdü. Amma bu yaxınlarda Adana klubundan ayrılaraq sərbəst oyunçuya çevrilmişdi.

Gökhan “Beşiktaş”da daha öncə bir mövsüm – 2016/17-də top qovub. O, həmin vaxt 30 rəsmi oyuna çıxaraq 2 məhsuldar ötürməylə fərqlənmiş, “Qartal” isə o mövsüm ölkə çempionu olmuşdu. Gökhan “ağ-qaralar”dan başqa 2015/16-da “Lester”, 2019/20-da “İstanbul BŞ” ilə də çempionluq sevinci yaşayıb.