“Bizi çox maraqlı qarşılaşmalar gözləyir. “Qarabağ” bu rəqiblə üçüncü dəfə üz-üzə gələcək. Hər iki komanda yetərincə iddialıdı. Düzdü, “Tvente” bir ara ciddi eniş yaşadı. Lakin indi toparlanıblar, yenidən böyük hədəflər uğrunda mübarizə aparırlar. Heyəti gəncləşdiriblər. Komandalar bir-birini yaxşı tanıyır. Məncə, “Qarabağ” öz istəyinə çatacaq. Çünki təmsilçimizin bunun üçün gücü, potensialı var. “Dinamo” ilə cavab matçında yeni gələn futbolçuların komandaya uyğunlaşmaqda olduğunu gördük. Əlbəttə, bunun üçün bir qədər də vaxt lazımdı. Çünki legionerlər yeni sistem, yeni ölkə, yeni mühiti tanımağa çalışır. “Qarabağ”ın hazırlaşmaq üçün vaxtı var. Bu müddətdə heyət daha yaxşı hala gətiriləcək. Səfər matçı istənilən halda çətin keçəcək, çünki niderlandlı azarkeşlər “Tvente”ni çox sevir, komandanın yanında olurlar. Yüksək səviyyədə dəstək göstərirlər. “Tvente”də oynadığım vaxtdan çox keçib. İndiyə qədər dəyişikliklər olub. Bu səbəbdən, rəqibin zəif cəhətləri haqda danışmaq mənim üçün çətindi. Ancaq Qurban Qurbanovun və futbolçularının onlara olan etimadı doğruldacağını düşünürəm. “Qarabağ” yoluna davam edəcək”.