Henri Onyekuru yenidən Türkiyədə oynayacaq.

Amma bu dəfə ''Qalatasaray''da yox, ''Adana Dəmirspor''da. Belə ki, Adana təmsilçisi 25 yaşlı vingeri ''Olimpiakos''dan birillik icarəyə götürüb. Transferin maddi detalları açıqlanmır. Adanalıların başqanı Murat Sancakın sözlərinə görə, onlar gələn yay Onyekurunu daimi əsasda transfer edə bilmək hüququnu da ələ keçiriblər. Amma komanda avrokuboklara vəsiqə qazansa, futbolçunun daimi əsasda transfer olunması maddəsi artıq məcburi olaraq qüvvəyə minəcək.

Qeyd edək ki, nigeriyalı futbolçu ilk dəfə 2018/19-da ''Qalatasaray''da oynayıb. Həmin vaxt çox baxımlı futbol sərgiləyən Onyekuru 31 superliqa matçında 14 qol vuraraq çempionluqda mühüm rol oynamışdı. Daha sonra o 2019/20-nin və 2020/21-nin ikinci dövrələrini də icarə əsasında ''Qalatasaray''da keçirmiş, amma uğurlu performans sərgiləyə bilməmişdi. Onyekuru indiyə qədər 3 fərqli dönəmdə ''Cim-Bom''da 71 oyuna çıxaraq 22 qol vurub.