Türkiyə çempionatında 3-cü tura dünən keçirilən 3 qarşılaşma ilə yekun vuruldu.

''Konyaspor'' debütant ''İstanbulspor''u darmadağın edərək mövsümdə ilk qələbəsini qazandısa, ''Sivasspor'' Rza Çalımbayın məşqçi kimi superliqada yubiley – 600-cü oyununda ''Alanyaspor''la qarşılaşmada qələbəni son dəqiqələrdə əldən verdi.

Qeyd edək ki, Çalımbay bu göstərici ilə 2-ci pillədə qərarlaşıb və turnirin tarixində yalnız Samet Aybabadan (621) geri qalır.

Günün və turun mərkəzi oyununda ''Fənərbaxça'' ''Adana Dəmirspor''u qəbul etdi. Bu tura qədər büdrəməyən Adana təmsilçisi qalib gələcəyi təqdirdə 3 turdan sonra maksimum xal toplayan yeganə komanda olacaqdı. Oyun çox gərgin və məhsuldar alındı. ''Fənərbaxça'' artıq 48-ci dəqiqədə 3 topluq üstünlük yaxaladı. Qonaqlar daha sonra fərqi minimuma endirərək intriqanı bərpa etsələr də, son sözü yenə də ''Fənər'' söylədi – 4:2. Qarşılaşmaya damğa vuran olay isə '' Adana Dəmirspor''un həyətindəki sabiq ''Qalatasaray''lılar – Belhanda ilə Onyekurunun hərəkətləri oldu. Bu futbolçular matçboyu dəfələrlə tribunaları təxribata sürükləməyə çalışdılar. Onların ikisi də bir neçə dəfə tribunalara ''4'' işarəsi göstərərək ''Qalatasaray''ın 4 ulduzunun olmasını gözə soxmağa çalışdılar. Bundan başqa Onyekuru yerli fanatlara ''ağlamaq'' işarəsini də göstərdi və üstəlik oyundan sonra həmin an çəkilən şəklini paylaşaraq ''4-cü ulduzu alana qədər sakit olun'' ifadəsini yazdı. Onyekuru ilə Belhanda ''Qalatasaray''da oynadıqları dönəmdə də dəfələrlə ''Fənər''ə ilişmələri ilə diqqət çəkirdi. Belhanda heç vaxt Kadıköydə məğlubiyyət acısı yaşamaması ilə öyünürdü ki, onun bu seriyasına dünən son qoyuldu. ''Fənər''lilər isə sosial şəbəkələrdə ''Onyekuru ilə Belhanda 4 istədi, biz də 4 vurduq'' cümləsi ilə qarşı tərəfin cavabını verməyə çalışdılar. Jorje Jezuşun komandası bu mövsüm ilk dəfə liderliyi ələ keçirdi. 3 tura 13 qol vuran ''Fənər''in məhsuldarlığı diqqət çəkir. İstanbul nəhəngi bu göstərici ilə öz rekordunu təkrarladı. ''Sarı-lacivərdlilər'' daha öncə 1961/62-də də 3 tura 13 dəfə fərqlənmişdilər. Enner Valensiya isə mövsümə fırtına kimi başlayıb və 3 turun hər birində dubl edib. Ötən mövsüm superliqada 25 oyuna 7 dəfə fərqlənən ekvadorlu futbolçu bu mövsüm artıq 3 oyuna 6 qol vurub!