''Fənərbaxça''da uzun müddətdi, zədə üzündən oynaya bilməyən Ceyden Oostervolde ilə bağlı xəbər var.

''Football-plus.az'' Türkiyə mətbuatına istinadən məlumat verir ki, son 1 ayda vətəni Niderlandda fərdi məşqlərə və yüngül qaçıslara başlayan futbolçu İstanbula gəlib. Oostervoldenin artıq məşqlərini Türkiyədə davam etdirəcəyi bildirilir.

Düzdü, onun nə vaxt oynaya biləcəyi ilə bağlı hələ də dəqiq məlumat yoxdu. Amma istedadlı futbolçunun bərpası gözləniləndən tez keçir. 23 yaşlı Oostervolde hələ oktyabrda 9-cu tur çərçivəsində səfərdə ''Samsunspor''la oyunda ağır zədə almışdı. Diz bağları qopan futbolçu vətənində əməliyyat olunmuşdu. Oostervolde ''sarı-lacivərdlilər''ə 2022/23 mövsümünün qış fasiləsində ''Parma''dan 6 milyon avroya transfer olunub.

Universallığı ilə seçilən müdafiəçi indiyə qədər ''Fənər''də 62 rəsmi oyuna çıxaraq 2 qol vurub. Bu mövsüm isə o, zədələnənə qədər 14 oyun keçirmişdi. Onun İstanbul nəhəngi ilə 2027-nin iyununa qədər müqaviləsi var.