Bu il 2014-dən bu yana davam edən çempionluq həsrətinə son qoymaq istəyən ''Fənərbaxça'' heyətini gücləndirməkdə davam edir.


Football-plus.az xəbər verir ki, bu qış artıq ''Adana Dəmirspor''dan mərkəz müdafiəçisi Samet Akaydını heyətinə qatan İstanbul nəhəngi indi də müdafiənin sol cinahını gücləndirib.

''Fənər'' Jorje Jezuşun tələbi ilə ''Parma''dan Ceyden Oostervoldeni transfer edib. 21 yaşlı futbolçuya görə 6 milyon avro ödənilib. Onunla 4,5 illik müqavilə imzalanılıb. 2001 təvəllüdlü surinaməsilli futbolçu ''Tvente''nin yetirməsidi və ilk peşəkar müqaviləsini də 2020-də məhz bu klubla imzalayıb. Burda ilyarım çıxış etdikdən sonra ''Parma'' onu əvvəlcə 6 aylığa icarəyə götürdü. Oostervolde özünü yaxşı tərəfdən göstərincə ''Parma'' ötən yay ''Tvente''yə 3 milyon avro ödəyərək onunla 4 illik müqavilə imzaladı. İstedadlı futbolçu bu mövsüm İtaliyanın B seriyası təmsilçisində 19 rəsmi oyuna çıxaraq 1 qol vurub.

Xatırladaq ki, ''Fənər'' bu yaxınlarda həm də Armindo Brumanı 4,5 milyon avroya daimi əsasda transfer etmiş və bu oyunçunu ''Braqa''ya icarəyə vermişdi. Türkiyə mətbuatının yazdığına inansaq, ''Fənərbaxça'' bu mövsüm 15 yeni oyunçu transfer edib və ümumilikdə 45 milyon avroya yaxın məbləğ ödəyərək tarixinin yeni rekorduna imza atıb. ''Fənərbaxça'' bu mövsüm dünyada transferlərə ən çox pul xərcləyən klubların siyahısında ilk ''50-liy''ə daxil olan yeganə Türkiyə təmsilçisidi.