''Fənərbaxça'' hələ ki, bu yayın Türkiyədə ən hay-küylü transferinə imza atmaq üzrədi.

"Football-plus.az" xəbər verir ki, uzun müddətdi İstanbul nəhəngi ilə danışıqlar aparan Edin Ceko bu gün səhər saatlarında İstanbula ayaq basıb.

Tanınmış bosniyalı forvard tibbi müayinədən keçdikdən sonra rəsmi müqaviləyə imza atacaq. 37 yaşlı futbolçu ''Fənər''in bu yay 2-ci yeni transferi olacaq. ''Sarı-lacivərdlilər'' bir müddət öncə ingiltərəli vinger Rayan Kenti transfer etmişdilər. ''İnter''lə müqaviləsi başa çatdığı üçün Türkiyəyə azad agent statusunda gələn Cekonun ''Fənərbaxça'' ilə ikiillik müqavilə imzalayacağı və illik 4,5 milyon avro qazanacağı gözlənilir.

Bundan başqa ona 2 milyon avro da imza parası veriləcək. Ceko ötən mövsüm ''İnter''də 52 rəsmi oyunda 14 qol, 5 məhsuldar ötürmə ilə fərqləndi.

ƏLİ RAUFOĞLU