Mövsümü istənilən şəkildə keçirməyən ''Fənərbaxça'' həm də zədə ilə bağlı şanssızlıqlar yaşamaqda davam edir.

Bir müddət öncə Cengiz Ündəri 1 aylığa itirən İstanbul nəhənginə indi də Ceyden Oostervoldedən bəd xəbər gəlib. ''Samsunspor''la oyunun ikinci hissəsində zədələnərək əvəzlənən 23 yaşlı futbolçunun diz bağları qopub! Bu isə futbolda ən ağır zədələrdən biri sayılır. Solaxay futbolçu əməliyyat olunmaq üçün vətəni Niderlanda yola düşüb. Onun təxminən 5-7 ay topa toxuna bilməyəcəyi gözlənilir.

Joze Mourinyo ''Mançester Yunayted''lə oyun öncəsi mətbuat konfransında hətta Oostervoldenin mövsümü başa vurduğunu, onun ən yaxşı halda mayda 1-2 oyuna çıxa biləcəyini qeyd edib. Oostervolde Fərdi Kadıoğlunun ayrılmasından sonra müdafiənin sol cinahında oynayırdı. ''Fənər'' avrokubok oyunlarında artıq bu cinahda sıxıntı yaşayacaq. Çünki həmin mövqedə oynaya bilən digər futbolçu Filip Kostiçin adı avrokubokların iştirak ərizəsində yoxdu. Bu gün ''Yunayted''ə qarşı matçda sol cinahda Mərt Müldürün qərarlaşacağı gözlənilir.

ƏLİ