“Qalatasaray”la yanaşı, “Fənərbaxça” da son günləri transferdə yetərincə fəal keçirdi. Komanda bir müddət öncə 3,7 milyon avroya “Adana Dəmirspor”dan Samet Akaydını və 4,5 milyon avroya PSV-dən Armindo Brumanı heyətinə qatmışdı. Düzdü, yaydan bəri heyətdə olan və özünü göstərə bilməyən Bruma artıq “Braqa”ya icarəyə verilib. “Fənər” növbəti transferini İtaliyadan reallaşdırıb. Belə ki, 6 milyon avro qarşılığında “Parma”dan Ceyden Oostervolde heyətə cəlb olunub. Əsasən müdafiənin sol cinahında oynayan 21 yaşlı futbolçu ilə 4,5 illik müqavilə imzalanıb. 2001 təvəllüdlü, Surinam əsilli futbolçu “Tvente”nin yetirməsidi və ilk peşəkar müqaviləsini də bu klubla imzalayıb. Burda ilyarım çıxış etdikdən sonra “Parma” əvvəlcə onu 6 aylığa icarəyə götürdü və sonra da ötən yay 3 milyon avro ödəyərək daimi əsasda transfer etdi. Baş məşqçi Jorje Jezuşun çox bəyəndiyi Oostervolde bu mövsüm İtaliyanın B seriyasında 19 rəsmi oyuna çıxaraq 1 qol vurub.

Football-plus.az xəbər verir ki, “Sarı-lacivərdlilər”in digər yeni transferi isə Əmrə Dəmirdi. Bilindiyi kimi, 18 yaşlı bu yarımmüdafiəçi ötən yay 2 milyon avroya “Kayserispor”dan “Barselona”ya transfer olunmuşdu. Amma Əmrə “Barselona B”də özünü göstərə bilməmişdi. Xarici dildə danışa bilməməsi onun Kataloniyada it-bat olmasına səbəb olmuşdu. Bunu baxmayaraq, “Fənər” Əmrənin istedadına güvənərək onu heyətinə qatıb və 4,5 illik müqavilə imzalayıb. Türkiyə mətbuatında iddia olunurdu ki, İstanbul nəhəngi “Barsa”ya bu oyunçuya görə 2 milyon avro ödəyəcək. Amma transfer faktiki havayı başa gəlib. “Barsa” müqaviləyə yalnız bir şərt saldırıb. Futbolçunun sonrakı satışından əldə olunacaq pulun 20 faizi kataloniyalılara çatacaq.

Şayiələrə inansaq, “Fənərbaxça” “Kayserispor”da çıxış edən Türkiyə yığmasının üzvü Onur Bulutun da keçidini həll edib. Amma 28 yaşlı sağ cinah müdafiəçi mövsümün sonuna qədər Kayseri klubunda oynamaqda davam edəcək və yayda azad agent statusunda İstanbul nəhənginə keçəcək. Samet Akaydının transferindən sonra gözdən düşən mərkəz müdafiəçisi Qustavo Enrikenin “Olimpiakos”a keçidi isə son anda baş tutmadı. Yunanıstanda “transfer pəncərəsi” bağlandığından braziliyalı futbolçu tibbi müayinədən keçməyə çatmadı. “Sambaçı” müqavilə ilə “Flamenqo”ya məxsusdu. Onun gələcək taleyi həll olunmasa, “Fənər” 2-ci dövrə üçün futbolçunun müqaviləsini dondura bilər.