''Qvardiolanın komandanı böhrandan çıxarmaq təcrübəsi yoxdu''
''Mançester Siti''nin qəfil çöküşü hazırda Avropa futbolunda ən çox müzakirə olunan mövzulardan biridi.
Oktyabrın sonlarına qədər komanda həmişəki səviyyəsini və iştirak etdiyi turnirlərdə iddiasını qoruyurdu. Məsələn, premyer-liqanın 9-cu turunda ''Sauthempton'' üzərində 1:0-lıq qələbədən sonra ''Siti'' 23 xalla turnir cədvəlinə başçılıq edirdi. Amma həmin oyundan sonra Xosep Qvardiolanın komandasına sanki nəsə oldu. ''Şəhərlilər'' o vaxtdan bu yana 10 rəsmi oyunun cəmi 1-də qalib gəldikləri halda 7 qarşılaşmada məğlub olublar! Ona görə də adətən təriflənən mütəxəssis haqda son vaxtlar yalnız tənqidi fikirlər səsləndirilir. Məsələn, bu günlərdə dünyaca ünlü italiyalı məşqçi Fabio Kapello bunları demişdi:
''Qvardiola sözsüz ki, əla məşqçidi. Amma eyni zamanda çox eqolu və özündən razıdı. Sırf buna görə bir neçə dəfə vacib titulları əldən verib. O hər zaman göstərməyə çalışır ki, titulları futbolçular yox, o özü qazanır. Bu üzdən bir çox böyük oyunlarda önəmli futbolçuları ehtiyatda saxlayır. Diqqətin futbolçulara yox, özünə yönəlməsinə çalışır''.
İndi də sabiq ingiltərəli müdafiəçi, hazırda şərhçi kimi çalışan Ceymi Karrager Qvardiolanı tənqid edib:
''Qvardiola böyük ehtimalla öz-özünə ''nə üçün yeni müqaviləyə imza atdım'' deyə düşünür. ''Siti''nin düşdüyü bu duruma adamın inanmağı gəlmir. Komanda çox böyük bir böhrandadı. Qvardiola bəlkə də tarixin ən güclü məşqçisidi. Amma indiki durumun səbəbləri ilə bağlı verə biləcəyi bir cavab yoxdu. Onun kimi bir məşqçi həqiqətən də acı çəkir. Daha öncə heç vaxt belə bir duruma düşməmişdi. Ona görə də onun üçün ikiqat çətindi. Qvardiolanın komandanı böhrandan çıxarmaq təcrübəsi yoxdu. Çünki onun komandaları heç vaxt böhranda olmayıb''.
ƏLİ
Digər xəbərlər
