Ötən mövsümü trebl ilə başa vuran ''Mançester Siti''nin bu mövsüm işləri heç də qaydasında getmir.

"Football-plus.az" xəbər verir ki, dünən premyer-liqanın 15-ci turu çərçivəsində ''Siti'' ''Aston Villa'' ilə səfər oyununda çox aciz təsir bağışlayaraq minimal hesabla məğlub oldu.

Xosep Qvardiolanın komandası ardıcıl 4-cü premyer-liqa oyununda qələbəyə həsrət qalaraq (3 heç-heçə, 1 məğlubiyyət) turnir cədvəlində 4-cü pilləyə gerilədi. Bu, komandanın 2016/17-dən bu yana ən pis seriyasıdı! 90 dəqiqəni meydan sahibləri 22, qonaqlar isə cəmi 2 (!) zərbə ilə tamamladılar. ''Aston Villa'' premyer-liqa çərçivəsində Qvardiolanın ''Siti''si ilə oyunda qapıya 21-dən çox zərbə vuran ilk komanda oldu!

Onu da bildirək ki, Unay Emeri məşqçi karyerasında ilk dəfə Qvardiola ilə dueldən qələbə ilə ayrıldı. Buna qədər bu məşqçilərin komandaları 13 dəfə üz-üzə gəlmişdi. Qvardiola bunların 9-dan qələbə ilə ayrılmışdısa, 4 qarşılaşmada bərabərlik qeydə alınmışdı.

ƏLİ