Afrikanın ən güclü və titullu yığmalarından olan Nigeriya ilə bağlı xəbər var.

Oktyabrın 10-da Afrika Millətlər Kubokunun seçmə mərhələsi çərçivəsində D qrupunun 3-cü turunda evdə Liviyanı 1:0 yenən Nigeriya təqvimə əsasən 4-cü turda oktyabrın 15-də bu dəfə Liviya ilə səfərdə qarşılaşmalı idi. Amma oktyabrın 13-ü günortadan sonra Liviyaya yola düşən nigeriyalıların başına inanılmaz hadisələr gə(tiri)lib.

Komandanın çarter reysinin təyyarəsi son anda Liviya hökumətinin qərarı ilə kiçik Əl-Abrak hava limanına yönləndirilib. Oyunun keçirilməli olduğu Benqazi şəhərindən təxminən 4 saatlıq məsafədə yerləşən bu hava limanından adətən hərbi məqsədlər üçün istifadə olunur. Nigeriyalı futbolçulara hökumətin icazəsi olmadan hava limanını tərk etmək qadağan edilib. Nəticədə onlar heç bir şəraiti olmayan bu hava limanında gecələməli olublar. Ümumilikdə isə onlar burda ac və susuz 18 saata qədər vaxt keçirməli olublar!

Oyunçular bununla bağlı müxtəlif paylaşımlar ediblər. Belə güman olunur ki, liviyalı futbolçular da ötən həftə Nigeriyada sərt şəraitdə qarşılanmışdılar. Liviya hökuməti də buna cavab olaraq məhz bu cür addım atıb. Amma Nigeriya özünə qarşı bu cür hörmətsizlikdən sonra oyuna çıxmaqdan imtina edib.

Futbolçular öz ölkələrinə qayıtmaq qərarına gəliblər. Bu oyunun aqibəti ilə bağlı hansı qərar veriləcəyi maraqla gözlənilir.