Bu gün premyer-liqanın ilk turunda “Zirə” “Şəfa”nı məğlub etdi – 2:0.

Matçdan sonra “qartallar”ın baş məşqçisi Rəşad Sadıqov jurnalistlərin suallarını cavabladı.

- Gözlədiyimiz kimi gərgin matç keçdi. Bu həftə ərzində futbolçularıma çətin oyun olacağını bildirmişdim. Apardığı seleksiya işləri ilə yenilənmiş komandaya qarşı çıxış edirdik. Avrokuboklardakı uğursuzluqlardan sonra ilk matçımıza çıxmışdıq. Rəqibin baş məşqçisi bizi yaxından tanıyır. O 7 il “Zirə”də çalışıb. Bu səbəbdən bəzi məqamlarda bizim oyunumuzu oxuya bilirdi.

- “Payde” ilə oyunda bitiricilik baxımından problem olduğunu görmüşdük. Bu gün isə tam əksini gördük. Bu problem artıq həll olunub?
- 7 ildi burdayam, ilk dəfə belə vəziyyətlə qarşılaşmışdım. İki matçda da üstün tərəf olsaq da, mərhələ keçə bilmədik. İnşallah, bunun üzərində çalışırıq. “Şəfa”ya qarşı oynamaq daha çətin idi. Rəqib qol imkanları yaradırdı. Sadəcə, “Payde” ilə matç bir qəza idi. Bu gün daha diqqətliydik. Estoniya klubu bizə əks-hücumlarda 2 qol vurmuşdu. Bu gün müdafiəçiləri daha ehtiyatlı gördüm. Ümid edirəm ki, dərs çıxarıblar.

- Bu gün sizi emosional gördük. Hakimin verdiyi qərarlardan narazıydız?
- Xeyr. Emosional olmaq narazı olmaq deyil. Lakin kobud səhvlər olarsa, bu zaman daha emosional olmaq lazımdı.

- Ötən “futbol ili”ndə İssa Cibrilla oynadığı matçlarda “Zirə” məğlub olmamışdı. Ötən mövsüm 6-7 dəfə zədələnmişdi. Bu səbəbdən o daha çox çalışır?
- Maraqlı statistikadı. İssa bizim üçün önəmli futbolçudu. O hücumların qurulması üçün çox öməmlidi. Bu mövsüm İssa ilə Qismət arasında rotasiya edəcəyik. Onunla bu barədə danışmışıq. Üzərində daha çox çalışır, daha çox istirahət edir.

- Bu gün sərt mübarizələrə girirdi. Bu səbəbdən ona əsəbləşdiz?
- Xeyr. Ötən il də o zədələri mübarizədən yox, əzələ dartınmasından almışdı. Daha çox istirahət edir ki, belə zədə almasın.

- Ərən Aydının çxıışı ilə bağlı nə deyə bilərsiz?
- Kiçik zədəsi olsa da, yaxşı çıxış etdi. Burda qol vursa da, “Payde”yə qarşı fərqlənə bilmədi. Ümumən onun çıxışından razıyam.

- Yeni futbol qaydalarından razısız?
- Çox əla qaydalardı. Biz özümüz də futbolçu kimi çıxış edəndə öndə olduğumuz anlarda vaxtı öldürmək istəyirdik. Lakin 1-ci hissədə “Şəfa”nın futbolçusu Nihad zədələnsə də, hakim onu 1 dəqiqə kənarda saxladı. Gələcəkdə bu nəzərə alınsa, yaxşı olar.

İSRAYIL XEYRULLAYEV