Tarixdə bir ilk yaşandı.

Komanda oyunları üzrə Azərbaycan adına ilk qızıl medal qazanıldı. Slovakiyada keçirilən mini-futbol üzrə Avropa çempionatında yığmamız qalib oldu. Final görüşündə Rumıniyanı Seymur Məmmədovun qolu ilə məğlub edərək titula sahib çıxdıq.

Dünən səhər saatlarında çempionlar vətənə döndülər. Gecə saat 03.00-dan bu hadisəyə sevinənlər Heydər Əliyev Beynəlxalq Hava Limanına yığışmışdı. Başverənləri, sadəcə, görmək lazım idi. Futbolda qələbəyə ac olan azarkeş kütləsi qalibləri təbrik etmək üçün hava limanına axışmışdı. 04.55-də qəhrəmanlar izdihamın önünə çıxdı. Onlar özləri də belə qarşılanmanı gözləmirdilər. Çempionlar baş üzərində gəzdirilir, insanlar “Azərbaycan, Azərbaycan” şüarını və çempionatda yığmamızın qələbə marşı olan “Yaşa, Azərbaycan” mahnısı səsləndirirdilər. Kimlər yox idi ki, hava limanında: jurnalistlər, blogerlər, Gənclər və İdman Nazirliyinin nümayəndələri, çempionların ailə üzvləri. Hamının sevinci son həddə idi. Rəqs edənlər, şəkil çəkdirənlər, futbolçuların medallarına toxunanlar hava limanında möhtəşəm aura yaratmışdılar. Dediyimiz kimi, bu xalq futbolda qələbələrə acdı. Bu sevinci onlara yaşadanlara təşəkkür edirik!