2018-dən bəri “Qarabağ”ın formasını geyən, son 8 ildəki tarixi uğurlarda böyük pay sahibi olan Abdulla Zubir komandadan ayrılıb. Müqaviləsinə qarşılıqlı razılıq əsasında xitam verilən fransalı futbolçu bundan sonra Qətərin “Əl-Şahaniya” komandasında çıxış edəcək. “Football-plus.az” sizə fransalı vingerin mövsümlər üzrə statistik göstəricilərini təqdim edir.

2018/19 mövsümündə debüt edən Abdullah Zubir həmin mövsüm premyer-liqada 24 matçda 1759 dəqiqə çıxış edib, 7 qol və 6 məhsuldar ötürmə ilə yadda qalıb. Həmin “futbol ili”ndə ölkə kubokunda 4 matçda 247 dəqiqə vaxt qazanıb, 1 məhsuldar ötürmə verib.

2019/20 mövsümündə elitada 19 matçda 1383 dəqiqə şans tapan Abdulla 5 qol, 7 məhsuldar ötürmənin müəllifi olub. Kubokda 2 matçda gördüyü 118 dəqiqədə 1 qol ötürməsi verib.

2020/21-də premyer-liqada 26 oyunda 1983 dəqiqə vaxt ərzində 7 dəfə topu rəqib qapısından keçirən fransalı 9 məhsuldar ötürmə verib. Ölkə kubokunda 4 matçda 197 dəqiqə görüb, 2 qol ötürməsi ilə yadda qalıb.

2021/22 mövsümündə o, elitada 25 matçda 1700 dəqiqə çıxış edib. Bu müddətdə 8 qol vurub, 9 məhsuldar ötürmə verib. Kubokda isə 4 matçda 329 dəqiqə oynayıb, 1 qol vurub.

2022/23 mövsümündə Abdulla premyer-liqada 32 matçda 2084 dəqiqə vaxt tapıb. 8 qol, 7 məhsuldar ötürmə müəllifi olub. Ölkə kubokunda 2 matçda 44 dəqiqə çıxış edib.

2023/24 mövsümü 34 yaşlı futbolçu üçün yaddaqalan olub. Elitada çıxdığı 32 matçda 1781 dəqiqə görüb, 8 qol, 14 məhsuldar ötürmə müəllifi olub. Kubokda 5 matçda 364 dəqiqə ərzində 3 dəfə topu rəqib qapısından keçirib, 1 dəfə qol ötürməsi verib.

2024/25-də premyer-liqada 30 matçda 1748 dəqiqə çıxış edib. Bu müddətdə 6 qol, 5 məhsuldar ötürmə müəllifi olub. Ölkə kubokunda 5 matçda 396 dəqiqə ərzində 1 dəfə topu qapıdan keçirib, 2 dəfə isə ötürmə müəllifi olub.

2025/26 mövsümündə 30 matçda 7 qol vuran, 9 məhsuldar ötürmə verən fransalı 2031 dəqiqə oynayıb. Ölkə kubokunda 5 Matçda 220 dəqiqə çıxış edib.

Zubir 8 il ərzində avrokuboklardakı uğurlara da töhfə verib:

Çempionlar Liqası - 48 oyun, 4 qol, 13 məhsuldar ötürmə

Avropa Liqası - 54 oyun, 11 qol, 7 məhsuldar ötürmə

Konfrans Liqası - 18 oyun, 3 qol, 3 məhsuldar ötürmə

Cəmi - 120 oyun, 18 qol, 23 məhsuldar ötürmə

Bu göstəricilərə təsnifat mərhələlərindəki çıxışı da daxildi.

“Qarabağ”ın heyətində 369 matç keçirən futbolçu 79 qol, 96 məhsuldar ötürmə ilə yadda qalıb. Onun matç üzrə orta qol göstəricisi 0,21, məhsuldar ötürmə göstəricisi 0,26-dı.

Zubir Ağdam təmsilçisinin heyətində 6 dəfə çempion (2019, 2020, 2022, 2023, 2024, 2025), 2 dəfə (2022, 2024) ölkə kubokunun qalibi olub.

İSRAYIL XEYRULLAYEV