Bu gün "Qarabağ" ÇL-in pley-off mərhələsinin cavab matçında tarixi sınaqdan üzüağ çıxmağa çalışacaq.

Rəqib Zaqreb "Dinamo"sudu. Oyun "CBC Sport"la canlı yayınlanacaq.

Çempionlar Liqası
pley-off, cavab oyunu
Qarabağ - Dinamo (Xorvatiya) 0:2
Marko Pyasa, 33. Matteu Silva, 54-ö.q.
Hakimlər: MAYKL OLİVER, Stüart Burt, Li Betts, Kris Kavenaq (hamısı İngiltərə).
28 avqust. Bakı. Tofiq Bəhramov adına Respublika stadionu. Saat 20.45.
İlk oyun - 0:3.

Zaqrebdən əli ətəyindən uzun qayıdan "Qarabağ" ÇL-in qrup, daha doğrusu, liqa mərhələsiylə bağlı arzularından uzaq düşdü. Baxmayaraq ki, "köhlən atlar"ın göstərdiyi oyun hesabla qətiyyən uyğun gəlmir. Sadəcə, "Dinamo"nun qol vəziyyətlərini maksimum dəyərləndirməsi matçın taleyini həll etdi. Əlbəttə, bu, azərbaycanlıların “Qarabağ”a tərəfkeşliyindən doğan pozitiv düşüncənin məhsulu deyil, Xorvatiya publikası da daxil olmaqla, əksəriyyətinin etiraf etdiyi məqamdı. Amma nə olsun?! Nəticə bəlli və dəyişməzdi. Durum ağdamlıların xeyrinə dəyişməlidisə, bunu yalnız özləri edə bilər. "Tofiq Bəhramov"un azarkeşlərlə dolub-daşacağına, tribunalardakı coşqunun "Qarabağ"a ruh yüksəkliyi, "mavilər"ə vahimə bəxş edəcəyinə şübhə yoxdu. Yeri gəlmişkən, stadionda qonaq komandanı təxminən 200 azarkeş dəstəkləyəcək. Onlar üçün 28-ci sector ayrılıb.

Bəli, yeganə çıxış yolu "köhlən atlar"ın azı 3 top fərqiylə qələbə qazanması, oyunun taleyini əlavə vaxta daşımasıdı. Buna "Qarabağ"ın baş məşqçisi Qurban Qurbanov başda olmaqla, yəqin ki, bütün azərbaycanlılar inanır. Mütəxəssisin fikri də bu yöndədi ki, premyer-liqanın 4-cü turunda - "Turan Tovuz"u qəbul etdikləri matçda məğlubiyyəti gözə alıb əsas futbolçularının xidmətindən minimum yararlandı. Hətta yeni qolkiper Mateuş Koxalskini də sınaqdan keçirdi. Hələ Musa Qurbanlının zədəsini sağaltdığını da gördük. Nəinki rəqib, bizim üçün də "sirli qutu" mahiyyəti daşıyan Emmanuel Addai də transfer edilib. Yəni Qurban Qurbanov bu dəfə fərqli strategiyadan yararlana bilər!

"Mavilər"in baş məşqçisi Sergey Yakiroviç də Xorvatiya çempionatının 4-cü turunda rotasiyaya əl atıb. O, "Qoritsa"ya qarşı matçda (2:1) bəzi əsas heyət oyunçularının dincəlməsinə şərait yaradıb. Maraqlıdı ki, "Dinamo"nun hər iki qolunu "Qarabağ"la matçda da dubl edən Sandro Kulenoviç vurub. Deməli, sabah meydançada o qədər də yorğun oyunçular izləməyəcəyik.

Uğurlar, "Qarabağ"! Çətin, amma mümkün missiya ilə qarşı-qarşıyasız.

KƏNAN BAHADIR