“Qarabağ” bu gün tarixi uğurunu təkrarlamağa gedən yolda ilk sınaqla üz-üzədi.

Bəllidi ki, Ağdam təmsilçisi Zaqreb “Dinamo”sunu mübarizədən kənarlaşdırsa, növbəti dəfə Çempionlar Liqasının qrup, daha doğrusu, liqa mərhələsinə vəsiqə qazanacaq. Beləliklə, ilk və sonuncu dəfə 2017/18 mövsümündə yaşadığımız xoşbəxtlik qapıdadı. Əlbəttə, bu dəfə gözləntilər daha böyükdü. Və sevindiricidi ki, qələbə istəyi, sadəcə, fantaziya deyil! Yerli futbol ictimaiyyətini böyük turnirlərdə böyük klublar üzərindəki böyük qələbələrə “Qarabağ” özü öyrəşdirib. “Köhlən atlar” sayəsində qitə futbolunun əjdahaları gözümüzdə cücəyə dönüb. Ən parlaq nümunə “Bayer-04”ün ötən mövsüm hər iki oyunda son anda məğlubiyyətdən qurtulmasıdı. Artıq Avropa “Qarabağ”ın adını eşidəndə diksinir, ehtiyatlanır, həyəcanlanır və başqa bu tipli narahatlıq mesajları verir.

Bəli, “Qarabağ”ın qələbəsini hamımız arzulayırıq. Uzaq olsun, məğlub olsa, gözümüzü cavab oyununa dikəcəyik, yenə ağdamlıların “Dinamo”nu mübarizədən kənarlaşdıracağına inanacağıq. İndi “köhlən atlar” tam gücüylə oynasa, istənilən rəqibə başağrısı ola bilər” dediyimiz dövrü yaşayırıq. Bu dəfə rəqibi nə kiçiltdik, nə də böyütdük. Sıra özümüzdədi. “Qarabağ”ın simasında özümüzü böyüdək. Təbii ki, qələbələrin, keçilən mərhələlərin fonunda.

Bəlkə bu dəfə əjdaha “Qarabağ”, ovu isə “Dinamo” olsun?!

KƏNAN BAHADIR