“Şamaxı” son turda səfərdə “Zirə”ni məğlub etməklə cari mövsümdə ilk qələbəsini qazandı.

Oyundan sonra “qartallar”ın yarımmüdafiəçisi Ceyhun Nuriyevdən bəzi suallara cavab almağa çalışdıq.

- “Şamaxı” ilə oyunda 3 xal itirdiz. Bu oyunda nə alınmadı?
- Əslində, çox şey alınmadı deyə bilmərəm. Yaxşı oyun keçirdik, hər iki komanda sonacan mübarizə apardı. Sadəcə, çox erkən qol buraxdıq. Oyuna pis başladıq. Qoldan əvvəl də, sonra da təhlükəli vəziyyət yaratdıq. İkinci yarıda daha çox yükləndik. Qol vurduq, amma oyundankənar vəziyyətə görə ləğv etdilər. Ümumiyyətlə, pis oyun olmadı. Bir az şanssızlıq oldu. Toplar çərçivədən yan keçdi.

 - Ləğv edilən qola görə hakimə etiraz etdin, yoxsa ədalətli qərar verdiyini düşünürsən?
- Həmin epizoda hələ baxa bilməmişəm. Bilmirəm, oyundankənar vəziyyət vardı, ya  yox. Yəqin ki, düz olar. Belə qərar veriblərsə, deməli elə olmalıymış.

- "Omoniya" ilə oyun bu gün sizə təsir etdi, yoxsa "Şamaxı" gözlədiyinizdən daha güclü idi?
 - Çempionatın çox vacib olduğunu dərk edirik. Əvvəlki iki prermyer-liqa oyununun heç birində fikrimizi avrokuboklara yönəltmirdik. Avropada çıxıb necə maksimum gücümüzü ortaya qoyuruqsa, burda da ona çalışırıq. Yəni "Omoniya" ilə oyunun burda rolu olmadı.

- Çempionatda “Zirə”nin hədəfi nədi?
- Hələ 4-cü turdu, indidən hədəf müəyyənləşdirmirik. Meydana çıxdığımız bütün oyunlarda maksimumu xal qazanmağa çalışacağıq. Hansısa yeri tutmaq kimi hədəfimiz yoxdu. Sadəcə, hər oyuna qələbə üçün çıxacağıq.

- Son vaxtlar sosial şəbəkələrdə oyunun tənqid olunur. Bu tənqid səni ruhdan salmır?
- Xeyr, ruhdan salmır. Futbolda belə şeylər olur. Hələ 23 yaşım var. Oynaya biləcəyim 15 illik karyeramda tənqidlər də, təriflər də olacaq. Yəni gələcəkdə belə şeylərlə daha çox qarşılaşacam. Ona görə də tənqidi ürəyimə salıb, həvəsdən düşmürəm. Azarkeşlərin işi tərif və ya tənqid etmək, mənim işim isə meydana çıxıb oynamaqdı. Məni nə tərif yuxarı qaldırır, nə də tənqid aşağı salır. Bunların heç birinə fikir vermirəm. Əlbəttə, tərif eşitmək xoşdu. Tənqidləri də pis qəbul etmirəm. Mən, sadəcə, futbolunu oynayıram. Özüm-özümü təhlil edirəm, mənə özümün və məşqçimin çıxardığı nəticələr maraqlıdı, nəinki azarkeşlərin.

- Azarkeşlərə nə demək istərdin?
- "Omoniya" ilə oyuna gəlsinlər, komandanı dəstəkləsinlər. Ağır məğlubiyyətdən sonra mərhələ keçə bilməsək də, ən azı qazanacağımız qələbədə onların da payı olsun.

- Ağır məğlubiyyətdən sonra Bakıdakı oyuna necə hazırlaşırsız?
- Baxmayaraq ki, səfərdə ağır məğlubiyyət oldu, cavab görüşündə əlimizdən gələni edəcəyik. Mərhələni keçməsək belə, qələbə qazanmaq üçün heç nəyi əsirgəməyəcəyik.

RÖYANƏ OĞUZ