Misli premyer-liqasında 11-ci tur geridə qaldı.

Football-plus.az xəbər verir ki, hakimlər 5 oyunda ümumilikdə 19 dəfə əlini cibinə atdı. Bunlardan 2-də birbaşa qırmızı vərəqə verildi. 17 nəfər isə, biri rəsmi şəxs olmaqla, “sarı” ilə cəzalandırıldı. Turun ən intizamlı komandası “Qarabağ”dı. “Köhən atlar”ın heç bir futbolçusu “Tura Tovuz”la matçda cəzalanmadı. Ən kobud kollektiv isə “Səbail”di. Komandanın 3 futbolçusu “sarı” aldısa, biri birbaşa “qırmızı” ilə meydandan kənarlaşdırıldı. Reportyorlarımızın qeydlərinə keçid alaq.

Səbail – Şamaxı, İNQİLAB MƏMMƏDOV
Bir neçə epizodda hər iki komandanın məşqçiləri 4-cü hakimə etiraz etdilər. Tural Bayramlı 42-ci dəqiqədə Adil Nağıyevə qarşı kobud oyundan sonra qovuldu. Həkim müdaxiləsindən sonra “Şamaxı”nın müdafiəçisinin meydana qayıtdığını görən Mahmud Qurbanov isə 4-cü hakimə sərt etiraz edərək, həmin epizodda “qırmızı” olmadığını bildirdi. Görüşün sonlarında yan xətdən “Səbail”in futbolçusu topu oyuna daxil etdi. Futbol qaydalarında autdan verilən ötürmə zamanı oyundankənar vəziyyət qeydə alına bilməz. Lakin laysman ofsayd olduğuna işarə etdi. Topun oyuna autdan daxil olduğunu nəzərə alsaq, baş hakim əsas söz sahibi kimi görüşü davam etdirə bilərdi. Lakin İnqilab Məmmədov bu məsuliyyəti üzərinə götürmədi. Bu, matçda son epizod olduğuna görə final fitindən sonra, demək olar ki, “Səbail”in bütün futbolçuları və texniki heyəti yan xətt hakiminə sərt etiraz etdi. Laysmanın bu səhvini nəzərə almasaq, İnqilab Məmmədov ümumilikdə oyunu normal idarə etdi. Qırmızı vərəqə epizodunda da təkrara baxanda hakimin haqlı olduğunu görmək mümkün idi.

Qarabağ – Turan Tovuz, VÜQAR HƏSƏNLİ
"Qarabağ"ın üstün olduğu matçda hakimin işi o qədər də nəzərə çarpmadı. Vüqar Həsənli hadisələrə vaxtında müdaxilə edir, demək olar ki, səhvə yol vermirdi. Onun köməkçiləri ilə əlaqəsi də olduqca yaxşı idi. Penalti epizodunda da Qurban Qurbanovun müdaxiləsinə imkan vermədi. Onun qarşılaşmanı ideala yaxın idarə etdiyini deməmək günah olar.

Sumqayıt – Zirə, FƏRİD HACIYEV
Oyundan öncə Fərid Hacıyevin əziyyət çəkəcəyini söyləmək olardı. Çünki hər iki komandanın baş məşqçisi olduqca çılğın və hakim qərarlarına müdaxilə edən şəxsdi. Lakin ehtimallar özünü doğrultmadı. Çalşşdırıcılar, sadəcə, xırda nöqsanlar zamanı Hacıyevə etiraz edirdilər. Onların oyundan sonra hakimlik barədə danışmaması da gənc referi üçün müsbət məqamdı.

Qəbələ - Kəpəz, RƏŞAD ƏHMƏDOV
Qarşılaşma yağışlı, küləkli havada keçdi. Təhlükəli vəziyyətlər çox olsa da, Rəşad Əhmədov oyunu yaxşı idarə etdi. Onun VAR-a baxandan sonra penaltini ləğv edərək, simulyasiyaya görə Ramon Maçadoya rəsmi xəbərdarlığı da təqdirəlayiq idi.

Neftçi – Sabah, KAMAL UMUDLU
Turun mərkəzi qarşılaşmasının öhdəsindən gəldi, nəticəyə təsir edən səhvə yol vermədi. Ancaq Kamal yenə mübahisəli epizodlarda qərar verməkdə çətinlik çəkirdi. Bəzən ehtiyac olmadan VAR-müraciət edir, görüntüləri uzun-uzadı izləyib oyunun tempini aşağı salırdı.