Bilindiyi kimi, “Turan Tovuz” səfərdə “Qarabağ”ı 1:0 hesabıyla məğlub etdi.

Oyundan sonra tovuzluların müdafiəçisi Faiq Hacıyev “Football-plus.az”ın suallarını cavabladı.

- “Qarabağ”dan 3 xal qazandığınız oyunu necə şərh edərdin?

- Oyun çox yaxşı keçdi. Məşqçinin tapşırıqlarını tam yerinə yetirməyə çalışdıq. Şükür ki, qələbə də qazana bildik. Dayanmaq olmaz. Bundan sonra da qələbələr qazanmaq lazımdı.

– Bu qələbə “Qarabağ”ın diqqətini Çempionlar Liqasına yönəltməsi ilə bağlıdı, yoxsa “Turan Tovuz” çox güclənib?

– Deməzdim ki, çətinlik çəkmədik. “Qarabağ” həmişəki “Qarabağ”dı. Bəlkə də meydandan kənarda çəkdiyimiz əziyyət görünmürdü. Amma oyundan əvvəl də necə bir rəqibə qarşı oynayacağımızı bilirdik. İstər-istəməz “Qarabağ”la oynayanda komandalar ayrı motivasiyada olur. Biz də bu dəfə qol buraxmadıq, uduzmadıq.

– Birinci pillədə olmaq necə hissdi?

– Əlbəttə, ilk pillədə olmaq qürurvericidi. Birinci yerdəyik, hələ də qol buraxmamışıq. Amma çempionatın əvvəlidi, hər şey ola bilər. Ona görə də özümüzü hazırlamalıyıq. Ola bilər ki, indi yaxşı gedirik, amma sonra hansısa dövrədə düşərik. Bütün bunlara hazır olmalıyıq. İnşallah, belə davam etmək, daha yüksək yerlərdə qərarlaşmaq fikrindəyik.

– Boşa verilən penaltiyə görə heyifsilənirsizmi?

– Futbolun maraqlı tərəfi bunlardı. İkinci qolu vursaydıq, bəlkə də daha rahat olacaqdıq. Bir top fərqi bizə daha konsentrasiyalı olmağı öyrətdi.

– Qarşınıza hansısa hədəf, məsələn, çempionluq qoyulubmu?

- Hədəf ən yüksəkdi. Bacardığımız qədər yuxarı pillələrdə yer almalıyıq. Çempionluğu bacararıqsa, niyə də olmasın?!

RÖYANƏ OĞUZ