“Football-plus.az” xəbər verir ki, Ukrayna klubları avrokubokların yeni mövsümündə təsnifat mərhələlərində qələbə qazanmayan iki ölkədən biridi. Nə qədər qəribə olsa da, Ukrayna bu göstəricidə Monteneqro ilə sonuncu yeri bölüşür.
Xatırladaq ki, hazırda Rusiya işğalına qarşı ləyaqətlə mübarizə aparan ölkənin üç komandası bu həftə fiasko ilə üzləşib. “Dinamo” PAOK-a hər iki oyunda uduzmaqla Avropa Liqasından Konfrans Liqasına yollanıb. LNZ Konfrans Liqasında “Gent”, “Polesye” isə “Kopenhagen” ilə bacarmayıb. Ukrayna təmsilçiləri indiyə qədər keçirdiyi 8 oyunun heç birində qələbə qazanmayıb (5 heç-heçə, 3 məğlubiyyət).
Belə çıxır ki, məhz “Dinamo” Ukraynanın qələbə xanasındakı 0-ı düzəltməyə çalışacaq. Avqustun 6-da Polşanın Lyublin şəhərində kiyevlilərin qonağı olacaq “Qarabağ” isə buna imkan verməməlidi. Onu da xatırladaq ki, Ukraynanın avrokuboklardakı daha bir təmsilçisi “Şaxtyor” ÇL-in liqa mərhələsində mübarizə aparacaq.
ORXAN