İstanbul nəhəngləri transfer çalışmalarını davam etdirdikləri bir vaxtda ''Beşiktaş''la ''Fənərbaxça'' arasında oyunçuların dəyişdirilməsi ilə bağlı maraqlı bir iddia ortaya atılıb.

''Beşiktaş''ın ''Fənər''li Oğuz Aydına ciddi maraq göstərməsi sirr deyil. Türkiyə yığmasının üzvü olan və mundiala da yollanan Aydın ''qartal''ın təklifini geri çevirərək ''Fənər''də qalmağa üstünlük verib. Amma ''ağ-qaralar''ın bu oyunçuya marağının davam etməsi üzündən ortaya yeni variant çıxıb.

Belə ki, ''Fənər''in də ''Beşiktaş''lı Əmirhan Topçu ilə maraqlandığı və bu futbolçuların dəyişdirilmə ehtimalının olduğu bəlli olub. Mərkəz müdafiəçisi olan Əmirhan ötən mövsümün gedişində hətta ''Milan''ın da maraq dairəsinə düşmüşdü. İtalyanlar onu izləmək üçün Türkiyəyə skaut göndərmişdilər. Hazırda tərəflər birbaşa dəyiş-düyüşün mümkünlüyünü müzakirə edirlər.

Hər iki futbolçunun 25 yaşı var və hər ikisinin transfer dəyəri 7 milyon avrodu. Üstəlik hər ikisinin öz klubu ilə 2028-in yayına qədər müqaviləsi var. Amma hələlik heç bir klubdan bununla bağlı rəsmi açıqlama gəlməyib.