Turun mərkəzi görüşündə bu mövsüm avrokuboklara vəsiqəni hədəf götürən komandaların duelinə şahidlik etdik.

Lakin qarşılaşmaya maraq gözlənilən kimi olmadı. “Zirə”nin əksər ev oyunlarında meydan sahibləri üçün ayrılmış tribunalarda boş yer tapmaq olmurdu. Amma bu dəfə zarkeşlərin sayı xeyli azalmışdı. Qonaq sektoru isə heç yarıya qədər dolmamışdı. Hər iki komandanın fanklubu - “Qartallar” və “Soldati di Sabah” yerində idi.

Oyun qarşılıqlı hücumlarla başladı. İlk təhlükəli vəziyyəti Tilin ifasında qonaqlar yaratdı. Lakin onun zərbəsi qapıdan aralı keçdi. Meydan sahiblərinin buna cavabı özünü çox gözlətmədi. Kulaçın başla zərbəsi təhlükəli alındı. 2 dəqiqə sonra Anatoli Nuriyev “Zirə”yə həyəcanlı anlar yaşatdı. Ukraynalı topu az fərqlə qapıdan yana vurdu. İlk hissənin demək olar ki, ən yaddaqalan epizodu 15-ci dəqiqədə baş verdi. Cibrilla uzun reydini gözəl ötürmə ilə tamamladı. O, Kulaçı qapıçı ilə üz-üzə qoydu. Lakin Vladislav təxminən 12 metrdən topu qapıya göndərə bilmədi. Hissənin sonlarında Ceyhun Nuriyevin fəallığı özünü göstərdi. Onun cinah asmasını Quliyev qapasa da, zərbədə dəqiqlik çatmadı. Nuriyev daha bir ötürmə ilə Renatonu zərbə mövqeyinə çıxarsa da, Mehbalıyev braziliyalıya imkan vermədi. Ceyhun istəyinə üçüncü ötürməsində çatdı. Quliyev topu qapıdan keçirdi. Lakin VAR oyundankənar vəziyyət qeydə alaraq qolu ləğv etdi. Fasiləyə qədər Eldar daha bir zərbə ilə yadda qaldı. Amma bu dəfə dəqiq ola bilmədi. Hissənin sonunda “Sabah” azlıqda qaldı. Kapitan Elvin Camalov ikinci sarı vərəqəni alaraq meydanı vaxtından əvvəl tərk etdi. İlk yarıya artırılan dəqiqələrdə Cibrilanın zərbəsi qapının üstündən keçdi. 1 dəqiqə sonra Nuriyevin baxımlı zərbəsini Mehbalıyev eyni gözəlliklə dəf etdi.

İkinci yarının startında yenə Nuriyev səhnəyə çıxdı. Onun cərimə meydançası kənarından endirdiyi zərbə az fərqlə qapıdan yan keçdi. Ardından “Zirə”nin çoxgedişli kombinasiyası Zeblinin zərbəsi ilə nəticələndi. Amma Mehbalıyev yenə sayıqlığı əldən vermədi. 80-ci dəqiqədə Utziqin akrobatik zərbəsi dəqiq olmadı. Qonaqların ikinci yarıdakı ilk təhlükəli vəziyyətini Marqarita yaratdı. Onun ötürməsini Nuriyev zərbə ilə tamamlasa da, top qapının üstündən keçdi. 85-ci dəqiqədə Suma 3 oyunçunu aldadıb, qapıçı ilə üz-üzə çıxdı. Lakin bu dəfə də duelin qalibi Mehbalıyev oldu. Oyunun son dəqiqəsində Marqarita Nicatın toxunuşundan sonra yerdə qaldı. Rauf Cabbarov videotəkrara baxandan sonra epizodu 11 metrlik cərimə zərbəsi kimi qiymətləndirdi. Penaltini Çakla dəqiq yerinə yetirdi – 1:0.

Bununla da “Sabah” xalını 26-ya çatdıraraq yenidən “Turan Tovuz”u geridə qoydu. “Zirə”nin isə qolsuz və qələbəsiz seriyası 7-yə çatdı.

Gözdən qaçmadı
* Oyunu izləyənlər arasında veteran futbolçu İsgəndər Cavadov və milli komandamızın məşqçisi Arif Əsədov da var idi.
* Qırmızı vərəqə epizodunda Murad Musayev dördüncü hakimə kəskin şəkildə etirazını bildirdi.
* Qoldan sonra “Qartallar” “Zirə”nin haqqı haramınız olsun” şüarını səsləndirdi.
* Final fitindən sonra Ruan Renato rəqib futbolçuların və hakimin üzərinə şığıdı. Komanda yoldaşlarının səyləri nəticəsində onu sakitləşdirmək mümkün oldu.

İSMAYIL XEYRULLAYEV