Bu mövsüm, heç olmasa, Konfrans Liqasının əsas mərhələsində oynamaq istəyən “Qarabağ”ın yolundakı növbəti maneə Kiyev “Dinamo”sudu. Bəli, SSRİ futbolunun ən titullu klublarından biri adı çəkilən turnirin 3-cü təsnifat mərhələsində “Qarabağ”a rəqib olacaq. İlk iyun avqustun 6-da Lyublində, cavab görüşü isə 13-də Bakıda keçiriləcək. İyulun 23-də PAOK-u qəbul edən (təbii ki, bu ifadə şərti xarakter daşıyır; oyun Polşada keçirilib) “Dinamo” yunanlara 2:3 uduzub. İyulun 30-da Salonikidə keçirilən oyunda isə bu məğlubiyyətin əvəzini çıxmaq mümkün olmayıb – 0:2. “Football-plus.az” kiyevlilərin baş məşqçisi İqor Kostyukun oyunsonrası açıqlamasını təqdim edir: “Bugünkü oyunu bir oyunçu – Yannis Konstantelias (dubl edib – red.) qazandı. Təəssüf ki, bizdə belə ustalıq səviyyəsinə malik oyunçu yoxdu. Bu gün çox güc sərf etdik, komandamızın potensialı var, nəyin hesabına oyunu yaxşılaşdıra biləcəyimizi anlayırıq. PAOK-un oyunçularının ustalıq səviyyəsi yüksəkdi. Ancaq yaxşı oynadığımız ilk yarını hesabımıza yaza bilərik. Sona qədər mübarizə aparmadığımız epizodlardan isə rəqib yararlandı – söhbət məhz haqqında danışdığım oyunçudan gedir”.