“Xankəndi şəhər stadionu balansında olan Gənclər və İdman Nazirliyi ilə razılıq əldə olundu, artıq klubumuz ev oyunlarını doğma Xankəndidə, azarkeşlərinin və futbolsevərlərin qarşısında oynayacaq. Şükürlər olsun ki, bu məsələ komandamızın xeyrinə həll olundu.

Əslində bu, həm də tarixi, siyasi və rəmzi əhəmiyyəti olan, böyük mənası olan bir hadisədi. Uzun illərdən sonra Azərbaycan futbolu Xankəndiyə - Qarabağa qayıdır. Xankəndidə PFL-in təşkilatçılığı ilə çempionat oyununun keçirilməsi tarixi hadisədi. Bu hadisə həm idman baxımından, həm milli futbol baxımından, həm də tarixi-siyasi aspektdən böyük əhəmiyyət daşıyır. Biz inanırıq ki, bu hadisə cəmiyyətdə də çox müsbət qarşılanacaq. Xankəndi şəhər stadionu tam təmirdən çıxandan sonra – bildiyimizə görə bunun üçün bir neçə ay vaxt tələb olunur – “Xankəndi” öz oyunlarını doğma şəhərdə, doğma divarlar arasında keçirəcək. MOİK-in də ev oyunlarını orda keçirməsi mümkündü. Çünki Xankəndi şəhər stadionu dövlətin balansında olan bir stadiondu və ordu klubu da həmin stadionun xidmətlərindən istifadə edəcəksə, bu nə bizə, nə də onlara maneə törədəcək. Azərbaycanda bir stadiondan bir neçə klubun istifadə etməsi praktikası var. Bir stadiondan iki komandanın istifadə etməsi hansısa narazılığa və ya ajiotaja əsas verməyəcək. Biz bunu normal qarşılayırıq. Hər klubun öz xətti, strategiyası və azarkeş camiəsi var. Mənə elə gəlir ki, belə hal baş versə belə, bu, “Xankəndi”də hansısa narazılığa səbəb ola bilməz”.