“Zirə” ilə “Sabah”ın bir qədər əvvəl bitən oyunda heç-heçə etdiyini bilən “Neftçi” qələbə təqdirində 2-ci pilləyə şərik olacağını anlayırdı və bu fürsəti dəyərləndirməyə borclu idi.

“Araz-Naxçıvan”a gəlincə, qələbəsiz oyunlar seriyası düşərgədə gərginliyi və Azər Bağırovun başının üzərini alan dumanların sıxlığını artırmışdı. Və “Neftçi” bacarmadı. Bununla da Miodraq Bojoviçin baş məşqçi postunda əyləşməsinin nə dərəcədə məqsədəuyğun olmasıyla bağlı düşünənlərin sıralarını genişləndirdi.

Şəxsən mən qələbə acı olan iki komandanın gərgin mübarizəsini gözləyirdim. Lakin gözləniltilər və təxminlər doğrulmadı. Hətta meydanda, sadəcə, bir komandanın olduğunu desək, yanılmarıq. İlk təhlükəli vəziyyət 15-ci dəqiqəyə təsadüf etdi. Künc zərbəsindən ötürülən topu Orxan qapıya yönəltdi, lakin dirək bakılıların köməinə çatdı. Bir qədər sonra Aksel təhlükəli zərbəylə qonaqları daha diqqətli oynamağa məcbur etdi. İrəliləyən dəqiqələrdə komandaların əks-hücumları zamanı ya müdafiəçilərin sayıqlığı, ya da qeyri-dəqiqlik real qol vəziyyətlərinin yaranmasına mane oldu. Yalnız ilk hissənin sonuna artırılan dəqiqədə Kuzmanoviçin yerdə qalmasından sonra qapıçıyla təkbətək çıxan Elçin dirəyi nişan aldı. İlk yarıda az-çox hücum quran “Neftçi” ikinci yarıda, demək olar ki, görünmədi. Ən real qol vəziyyəti 81-ci dəqiqədə yaşandı. Turanın cərimə meydançasına ötürməsini Orxan başla “çərçivə”yə göndərsə də Rza gözəl seyvlə komandasını hesabda geri düşməkdən qorudu. Oyunun taleyini bir qol həll etdi. Matçın 90-cı dəqiqəsində baş hakim əllə oyuna görə “Neftçi”nin qapısına penalti təyin etdi. Orxan güclü və dəqiq zərbə ilə naxçıvanlılara qələbə qazandırdı. Həm də cari mövsümdə qol sayını 7-yə çatdırararaq bombardirlər siyahısında ən çox qol vuran yerli futbolçu statusunu möhkəmlətdi. Beləliklə, Bağırovun yetirmələri bu qələbə sayəsində turnir cədvəlində iki pillə irəliləyərək 6-cı yerdə qərarlaşdı. “Neftçi” isə “Zirə” ilə 3-cü yeri bölüşür.

Gözdən qaçmadı
* 8-ci dəqiqədə Konte Kadiriylə mübarizədə yerdə qaldığı üçün hakim “Araz-Naxçıvan”ın qapısına cərimə zərbəsi təyin etdi. Azər Bağırov isə baş hakimin bu qərarına kəskin etiraz edərək? “Rəşad, VAR-a bax da? olmaz axı belə” dedi.
* 29-cu dəqiqədə Tural Eminə qarşı kobudluq etdiyinə görə sarı vərəqə ilə cəzalandırıldı. Azər Bağırov isə vərəqənin əsassız olduğunu dilə gətirərək oyunun baş hakiminə “Rəşad, əks-hücum var idi?” dedi.
* “Araz-Naxçıvan”ın oyunçusunun yerdə qalmasına baxmayaraq, “Neftçi” topu meydandan çıxartmadı və hücuma davam etdi. Buna görə “Sektor 85”dən kimsə komandanın kapitanına qəzəbini gizlətmədi: “Emin, kişi olun”.
* Orxan Əliyev əvəzənərkən kapitan sarğısını kimə verəcəyini bilmədiyindən vaxt getməsin deyə “Neftçi”nin legioneri Koffi sarğını Orxandan alaraq Turan Manafovun qoluna keçirdi.
* Həm “Forza Neftçi”, həm də “Sektor 85” sona qədər komandalarını fəal şəkildə dəstəklədilər.

KAMAL SƏFƏR