Bu oyun hər iki tərəf üçün vacib idi. Yalnız ilk turda 3 xal qazanan "tələbələr" 7 oyunluq qələbəsizlik seriyasını qırmalıydı.

Demək olar ki, autsayder mövqeyində qərarlaşan meydan sahibləri millinin matçlarıyla bağlı fasiləyə motivasiyalı yollanmaq istəyirdi. Bu baxımdan qələbə Murad Musayevin komandası üçün yeganə çıxış yolu idi. Qonaqların durumu isə nisbətən yaxşıdı. Azər Bağırovun komandası dillər əzbəri olub. Çətin rəqiblərə qarşı inamlı mübarizəsiylə seçilən Muxtar Respublika təmsilçisi Masazıra ən azı 1 xal arxasınca gəlmişdi.

Tərəflərin istəkli başladığı oyunda ilk təhlükəli vəziyyəti "Sabah"ın ifasında izlədik. Ev sahibləri 7-ci dəqiqədə hesabı açmağa yaxın idi. Lakin Avram irəli atılaraq Apehlə təkbətək mübarizədən qalib ayrıldı. "Tələbələr" növbəti şansdan da faydalana bilmədi. Aminin başla zərbəsi qapının yaxınlığından keçsə də, "çərçivə"yə düşmədi. “Sabah” qonaqları qapı önünə sıxışdırır, qol axtarışını davam etdirirdi. Buna baxmayaraq, "qırmızı-ağlar"ın qapıçısı ayıq-sayıq davranır, gah irəlidə, gah da qapı xəttində komandasını qoldan xilas edirdi. "Araz-Naxçıvan"ın oyun tərzi 20-ci dəqiqədən sonra dəyişdi. İndiyə qədər müdafiə olunmağa məcbur edilən tərəf tez-tez Yusifi narahat edirdi. Bu ərəfədə real qol şansı yaransa da, Maşike fürsəti əldən verdi. Qapıçıya toxunan top meydanı tərk etdi. "Sabah" üstünlüyü əldən vermək istəmirdi. Odu ki, sürətli oyunla rəqibini yormağa və fasiləyə qədər azı 1 qol vurmaq istəyirdi. Hətta məqsədə çatmaq üçün yararlı epizod da var idi. Amma Namikin uzaqdan zərbəsi arzunu reallaşdırmadı. Muxtar Respublika təmsilçisinin təcrübəli qolkiperi təslim olmurdu. Avram ikinci cəhddə topu yaxalaya bildi. Namik bir neçə dəqiqə sonra yenə bəxtini sınadı. Zərbə qapı tirinin üzərindən keçdi. Birinci hissənin sonuncu təhlükəli epizodunda da "Sabah" baş rolda oldu. Əslində Parris "çərçivə"ni dəqiq nişan almışdı. Lakin Apehin toxunuşu topun yönünü dəyişdi və ofsayd qeydə alındı.

Azər Bağırov 2-ci hissədə Maşikeni komandanın qol "silahı" Orxanla əvəzlədi. Cəmi bir neçə dəqiqə sonra qonaqların daha bir hücum cəhdini izlədik. Burda Yusif Orxanın başla zərbəsini dəf etdi. İrəliləyən dəqiqələrdə İrasabal və Belfodil Avramı məyus edə bilmədi. Qolkiper təhlükəli vəziyyətlərdə cəld və soyuqqanlı davrandı. Nəhayət, 76-cı dəqiqədə hesab açıldı. Cərimə zərbəsini yerinə yetirən Nqando topu qapı önünə göndərdi. Belfodil təhlükəni sovuşdurmaq istəsə də, qapıların yerini səhv saldı. Nəticədə başla toxunduğu top öz qapısından keçdi - 0:1. Masazır təmsilçisi "soyuq duş"dan tez ayılıb hücumların kəsərini artırdı. Lakin moldovalı qolkiper keçilməz idi. Avram dərhal Nuriyevin Belfodilə göndərdiyi topa yiyələndi. Qonaqlar istəyinə 82-ci dəqiqədə çatdı. Aleksey naxçıvanlıların arasından sıyrılaraq Anatoliyə ötürmə etdi. Qonaqların qolkiperi adəti üzrə önə atılaraq rəqibə mane olmaq istəsə də, alınmadı. Ukraynalı futbolçu hesabı bərabərləşdirdi - 1:1. Bundan sonra "Araz-Naxçıvan" sanki nəticəylə barışmış kimi davrandısa, "Sabah" növbəti qol üçün mübarizə apardı. Amma "tələbələr" sona qədər ikinci dəfə sevinə bilmədi. Beləliklə, Murad Musayevin komandası ardıcıl 3-cü dəfə "sülh"ə razılaşmalı oldu. Görünür, "özümüzə gəlmək üçün 1 qələbə kifayət edəcək" deyən mütəxəssis növbəti turdan mədət ummalıdı.

Gözdən qaçmadı
* Yığmanın oyununu izləməyə gələn məşqçisi Arif Əsədov "Bank Respublika Arena"ya buraxılmadı
* Stadionun tablosu ilk dəqiqələrdə işləməsə də, sonradan düzəldi.
* Matçın təxminən ilk 20 dəqiqəsi geridə qalsa da , onlarla azarkeş stadionun girişində yoxlanılırdı.
* "Araz-Naxçıvan"ın "Sektor 85" azarkeş qrupu da tribunalarda idi. Lakin fankub bayrağı açmamışdı.
* "Soldati di Sabah" və "Sektor 85" fanklubları görüşün 44-cü dəqiqəsində "Şəhidlər ölməz, vətən bölünməz", "Ən böyük əsgər bizim əsgər!" şüarlarını birlikdə səsləndirdi.
* "Araz-Naxçıvan"ın futbolçusu Abdulla Rzayev Belfodilin avtoqolunu baş məşqçi Azər Bağırovu qucaqlayaraq qeyd etdi.

KƏNAN BAHADIR