Zarafat-zarafat, amma Azərbaycan premyer-liqası yavaş-yavaş İngiltərə premyer-liqasına oxşamağa başlayır.

İndi bizdə də istənilən komanda digərini məğlub edə bilər, ev-səfər anlayışı aradan qalxmağa başlayıb. Mövsüm başlamamış çempionluğa əsas namizəd kimi göstərilən komandalardan heç biri ilk iki pillədə qərarlaşmayıb.

...Turun açılış oyunu Masazırda keçirildi - “Sabah” “Turan Tovuz”u qəbul etdi. Və sensasiya qeydə alındı. Ayxan Abbasovun komandası “bayquşlar”ı darmadağın etdi. Açıq-aşkar hiss olunur ki, “Sabah”da mənəvi-psixoloji problem var. Murad Musayev komandanı bu durumdan qurtarmalıdı.
Turun 2-ci oyunun Qəbələdə keçirildi. “Qırmızı-qaralar” lider “Zirə”ni qəbul edirdi. Rəşad Sadıqovun komandası 1-ci pillədə qərarlaşmasının təsadüf olmadığını göstərməliydi. Lakin alınmadı. İlk 4 oyunda xal toplaya bilməyən Elmar Baxşıyevin rəhbərlik etdiyi kollektiv rəqibi minimal hesabla məğlub etdi.

Şənbənin ikinci matçı Sumqayıtda keçirildi. “Kimyaçılar”ın “Neftçi” ilə duelinin taleyini 1 qol həll etdi. Yeni transfer Dieqo Valdes paytaxt klubna çox vacib 3 xal qazandıran qolu vurdu. Beləliklə, Samir Abasovun komandası turnirdə ilk məğlubiyyətini yaşadı.

Bazar günü “Kəpəz” doğma meydanda “Araz-Naxçıvan”la qarşılaşdı. Mövsümün əvvəlindən bu komandalar premyer-liqanın autsayderlərindən sayılırlar. Oyuna maraq yetərincə böyük idi. “Neftçi”ni məğlub, “Qarabağ”la heç-heçə edən gəncəlilərin bu görüşdə hansı nəticəni əldə edəcəyi maraqla gözlənilirdi. Lakin qonaqlar daha yaxşı oyun sərgiləyərək meydandan qələbə ilə ayrıldı. Hesabına 7-ci xalı yazdıran Azər Bağırovun komandası autsayderlər sırasından bir qədər də uzaqlaşdı.

Turun ən maraqlı və baxımlı oyunu “ASCO Arena”da keçirildi. “Səbail”lə “Qarabağ”ın üz-üzə gəldiyi qarşılaşmada sensasiya qeydə alındı desək, yanılmarıq. Ağdamlılar Keyta ilə hesabı açsalar da, “dənizçilər” Ramalinqomun dublu sayəsində qələbə qazandı.

Misli premyer-liqası
1-ci dövrə, 5-ci tur
1 sentyabr
Sabah – Turan Tovuz 0:3
2 sentyabr
Qəbələ - Zirə 1:0
Sumqayıt – Neftçi 0:1
3 sentyabr
Kəpəz – Araz-Naxçıvan 1:2
Səbail – Qarabağ – 2:1

1. Zirə 5 4 0 1 5-2 12
2. Turan Tovuz 5 3 0 2 9-6 9
3. Neftçi 5 2 2 1 5-3 8
4. Sumqayıt 4 2 1 1 7-4 7
5. Qarabağ 5 2 1 2 7-5 7
6. Səbail 5 2 1 2 8-9 7
7. Araz-Naxçıvan 5 2 1 2 6-7 7
8. Sabah 4 1 1 2 6-5 4
9. Kəpəz 5 1 1 3 3-6 4
10. Qəbələ 5 1 0 4 2-11 3

Bombardirlər: Aleksandr Ramalinqom (Səbail), Martin Petkov (Turan Tovuz) – 3.

Növbətin turun oyunları:

15 sentyabr, 17.00. Zirə - Sumqayıt
16 sentybr, 16.00. Kəpəz – Səbail
16 sentyabr, 18.00. Araz-Naxçıvan – Neftçi
17 sentyabr, 16.30. Turan Tovuz – Qəbələ
17 sentyabr, 19.30. Qarabağ – Sabah

İLKİN SULTANLI