Son turlarda "Kəpəz"in nəticələrini yaxşılaşdırması, "Səbail"in müntəzəm xal itirməsi fonunda belə hesabı təxmin etmək çətin idi. O bəlli idi ki, "sarı-göylər" qələbə qazanmaq, 8-ci pilləyə doğru addımlamaq istəyir. Bunun üçün münbit şərait də var idi.

Düşərli Qəbələ stadionu, qənaətbəxş psixoloji durum, rəqibin eniş yaşayan “Səbail” olması – xoşbəxtlik üçün başqa nə lazımdı?! Heyətdə cəzalı və zədəli futbolçu da yox idi, Adil Şükürov da oyun ərəfəsində çox rahat görünürdü. Rəqibin ona "Kəpəz" karyerasındakı ən böyükhesablı məğlubiyyəti yaşadacağını necə təxmin edə bilərdi ki?!

Əslində ilk yarı belə nəticədən xəbər vermirdi. Çünki oyun gəncəlilərin ciddi təzyiqi altında başladı. İlk təhlükəli vəziyyətdə Junior "çərçivə"ni dəqiq nişan ala bilmədi. Ardından qonaqlardan Rüfət topu bacardığı qədər irəli daşıyıb Nunoya ötürdü. Portuqaliyalı qeyri-dəqiq zərbə vurdu.

Hesabı 29-cu dəqiqədə gəncəlilər açdı. Topa yiyələnən Papunaşvili cərimə meydançasına daxil olan Martinsə ideal ötürmə verdi. Belədə braziliyalı futbolçu topu Səlahətin solundan qapıya göndərdi - 1:0. 40-cı dəqiqədə bu uğuru Amil təkrarlaya bilərdi. Lakin qapıçı onun sol ayaqla qapıya göndərmək istədiyi topa vaxtında müdaxilə etdi. İlk yarının sonunda daha bir qol vuruldu. Xvalko cərimə meydançasında Almeyda ilə mübarizə apararkən topa əllə toxundu və bu məqam hakimin gözündən yayınmadı. Uzun-uzadı VAR-la məsləhətləşən, sonradan epizodu özü incələyən Nicat İsmayıllı "nöqtə"ni göstərdi. Ramalinqom bu fürsəti əldən verməyib hesabı bərabarləşdirdi. Rodrigesin cəldliyi uzaq küncə göndərilən topa müdaxilə etməyə bəs etmədi.
Beləliklə, "Kəpəz" ilk hissədə rəqibi oyun baxımından üstələsə də, bunu nəticəyə yansıda bilmədi. İkinci yarıda isə… Gəncəlilər elə ilk dəqiqələrdə əla şansı puç etdi. Əvvəlcə Martins Papunaşvilinin künc zərbəsindən ötürdüyü topu "çərçivə"dən keçirə bilmədi. "Kürə" öncə Rüfətə, sonra dirəyə dəyib meydandan çıxdı. İkincidə isə Amilin qolu ofsayd üzündən qeydə alınmadı. Belədə ruhlanan qonaqların hücumlarının kəsəri artdı. 52-ci dəqiqədə Alluş özünü topla birgə qapı önünə çatdırdı. Dərhal “mühasirəyə alınan” futbolçu Almeydaya, o isə Rüfətə ötürmə verdi. Sonuncu asanlıqla komandasının növbəti qolunu vurdu. Çünki Rodriges rəqibin legionerlərinə kökləndiyindən Rüfəti nəzarətsiz qoymuşdu. "Səbail" fərqi artırmaq üçün çox gözləmədi. Çox keçmədən, daha dəqiqi, 60-cı dəqiqədə Nuno künc zərbəsini yerinə yetirdi. Onun zərbə endirdiyi top "Kəpəz" futbolçularının başı üzərinə gəldi. Meydan sahibləri təhlükəni sovuşdurmaq istəyirdi ki, Alluş nəzarəti ələ keçirib "çərçivə"ni dəqiq nişan aldı - 3:1. Ardından Elçin kritik müdaxiləylə Ramalinqomun qol vurmaq istəyinə maneə oldu. İrəliləyən dəqiqələrdə Gəncənin həm yorğun, həm də çox güman ki, hesab üzündən ruhdan düşmüş təmsilçisi rəqibə qorxu yaşatmaqda çətinlik çəkirdi. Odu ki, matçın son dəqiqələrində son nöqtə qoyuldu. 90-cı dəqiqədə Luqasi Elçin Əlicanovun kobud səhvindən yararlanıb topu ələ keçirdi və daha əlverişli mövqedə olan Alluşa ötürdü. Niderlandlı yarımmüdafiəçi komandasının dördüncü, özünün ikinci qoluna imza atdı. Beləliklə, Adil Şükürov şok məğlubiyyətlə üzləşdi, "Səbail" isə 4 oyunluq qələbə həsrətinə son qoydu.

Gözdən qaçmadı
* Həm "Səbail"in "Dənizçilər", həm də "Kəpəz"in "Xəmsə" fanklubu sona qədər sevimlilərini dəstəklədi. Matç bitəndən sonra hər iki azarkeş qrupu futbolçuları yanına çağırdı. Biri təsəlli vermək, digəri qələbəni qeyd etmək üçün...
* Martins Junior qolunu xüsusi rəqslə qeyd etdi.
* Adil Şükürov ilk yarının uzatma dəqiqələrində hakimin penaltı qərarına qarşı çıxdığı üçün sarı vərəqəylə cəzalandırıldı.

KƏNAN BAHADIR