Tarixi Azərbaycan derbisinə azarkeş marağı elə də böyük deyildi.
Tribunalara boylandıqda üç azarkeş qrupunu – “Forza Neftçi”, “Neftçimania” və “Xəmsə”ni görmək mümkün idi. Digər sektorlarda isə demək olar ki, ümumilikdə 100 nəfər var idi, ya yox... “Neftçi” bütün hallarda qələbə üçün oynayacaqdı. “Sumqayıt”ın bir gün əvvəl qələbə sayəsində 3-cü pilləyə yüksəldiyini bilən bakılılar da ora göz dikmişdi. Digər tərəfdən, Adrian Mutunun Rumıniyaya yollanması, yeni baş məşqçi Miodraq Bojoviçin tribunada olması da futbolçulara təsir etməliydi.
Gözlənildiyi kimi, oyun meydan sahiblərinin üstünlüyü ilə başladı. Artıq 3-cü dəqiqədə Mahmudov cərimə meydançasında girərək ötürmə versə də, fərqlənən tapılmadı. Çox keçmədən bakılılar qol istəyinə çatdı. Boqomolski rəqibin bir neçə oyunçusunu geridə qoyub, topu qapı qarşısına göndərdi. Azər Salahlı effektli və yumşaq zərbə ilə topu tora göndərdi - 1:0. Qonaqlar isə 34-cü dəqiqədə qola yaxın oldu. Nianenin təhlükəli zərbəsi qapıdan az fərqlə aralı keçdi. Bir qədər sonra Papunaşvili “çərçivə”yə düşə bilmədi. Hissənin sonlarında Kvirkviyanın akrobatik zərbəsi baxımlı alındı. Lakin o da dəqiq ola bilmədi.
İkinci yarı da qarşılıqlı hücumlar şəraitində keçdi. Hissənin startında Boqomolski fərdi reydini zərbə ilə tamamlasa da, dəqiq alınmadı. 4 dəqiqə sonra Rodriges Lebonun fərqlənməsinə mane oldu. Qonaqlar 60-cı dəqiqədə Papunaşvili ilə hesabı bərabərləşdirdi. Lakin Niane passiv ofsaydda olduğundan qol qeydə alınmadı. “Neftçi” isə 71-ci dəqiqədə fərqi iki topa çatdırdı. Tamaşın endirdiyi topu Şinyaşiki başla qapıdan keçirdi – 2:0. Qoldan sonra meydan sahiblərindən Mirzovun, qonaqlardan Əlicanovun zərbələri təhlükəli alınsa, matçda hesab dəyişmədi. Bu qələbə ilə xalını 28-ə çatdıran “Neftçi” qış fasiləsinə 3-cü pillədə yollandı.
Gözdən qaçmadı
* “Forza Neftçi” “halaldı uşaqlar, halaldı uşaqlar, çempionluq getdi, halaldı uşaqlar” şüarını səsləndirirdi.
* “Neftçimania” “hamıya bəllidi kimdi çempion” şüarını oxuyurdu.
* Oyunsonrası mətbuat konfransında “ağ-qaralar” yeni baş məşqçisini açıqladı. Miodraq Bojoviç matçın əvvəlindən tibunada idi.
İSMAYIL XEYRULLAYEV