Fasilədə keçirdiyi yoldaşlıq oyununda “Zenit”ə qalib gələn “Neftçi”nin özünəinam problemi olmamalıydı. Üstəlik bakılılar ötən tur “Sumqayıt”dan aldığı məğlubiyyətə görə bu dəfə azarkeşlər önündə bəraət qazanmalıydı. “Araz-Naxçıvan” isə son iki turda “Sumqayıt”a və “Kəpəz”ə uduzmuşdu. Oyun qonaqların təzyiqiylə başladı

"Football-plus.az" xəbər verir ki, Azər Bağırovun yetirmələri ilk dəqiqələrdən dominant oyun göstərirdi.

“Neftçi”nin ilk təhlükəli hücumunu isə 27-ci dəqiqədə izdəlik. Avram bakılıların formasını 200-cü dəfə geyən Rəhmanın uzaqdan zərbəsini ustalıqla dəf etdi. Bundan sonra “Neftçi” bir qədər də fəallaşdı. 40-cı dəqiqədə Rəhmanın kornerdən qapı önünə göndərdiyi topu Şinyaşiki qarnıyla “yumşaltdı”. Əslində o, qol vurmaq istəyirdi. Lakin top Matiasın önünə düşdü. Braziliyalı müdafiəçi tərəddüd etmədən rəqib torunu silkələdi - 1:0. Ardınca Şinyaşiki fərqi artıra bilərdi. Amma onun başla zərbəsi qeyr-dəqiq oldu.

“Araz-Naxçıvan” 2-ci yarıya əvəzetmələrlə başladı. Azər Bağırov müdafiə xəttini Zamiq və Miço, hücumu isə Orxan ilə gücləndirdi. Dəyişikliklər ilk dəqiqələrdə özünü doğrultmurdu. Daha dəqiq desək, “Neftçi” fərqi artırmaq istəyiylə irəli atılırdı. Bu ərəfədə Rəhman komandasının qol axtarışını puç etdi. O, Şinyaşikinin dəqiq ötürməsini dəyərləndirə bilmədi. Mutunun anlaşılmaz əvəzetmələrini də izlədik. Görünür, rumıniyalı matçın 1:0 hesabıyla bitməsini arzuladığından Lebon, Eddi və Höccəti meydana buraxdı. Nəticədə ev sahiblərinin hücumlarının sayı azaldı. Bundan sonra qonaqlar meydanda hakimiyyəti bərpa etsə də, öncə Rodrigesin, sonra Kuzmanoviçin zərbəsi hədəfdən yayındı. İrəliləyən anlarda isə Avram Eminin uzaqdan zərbəsini zərərsizləşdirdi. Baş hakimin ikinci hissəyə artırdığı vaxtda “Neftçi”, belə demək mümkünsə, faciə ilə üzləşdi. Turan cərimə meydançasında dayanan Orxanı vaxtında gördü. O isə Matiasla Salahzadənin cinayətkarcasına məsuliyyətsizliyindən yararlanıb hesabı bərabərləşdirdi. Beləliklə, “Neftçi”nin qələbə ümidi suya düşdüsə, Muxtar Respublika təmsilçisi sürpriz 1 xal qazandı.

Gözdən qaçmadı
* “Forza Neftçi”, “Neftçi Mania” və “Araz-Naxçıvan”ın “Sektor 85” fanklubları stadionda idi. “Neftçi Mania”, demək olar ki, komandaya dəstək göstərmədi. Sadəcə, Orxanın qolundan sonra futbolçuları “yuh”ladı.
* Rəhman Hacıyev “Neftçi”nin heyətində 200-cü oyununa çıxdı. Baş icraçı direktor Fərrux Mahmudov bu münasibətlə onu təbrik etdi.

KƏNAN BAHADIR