Səfərdə Estoniya üzərində inamlı qələbə qazanan yığmamızın bu dəfə də xal hesabını artıracağını düşünənlərin sayı çox idi. Düzdü, qələbəyə bir o qədər ümid etmirdik. Rəqib AÇ-nin final mərhələsinə adlamağa yaxın olduğundan Bakıda böyük motivasiya ilə oynayacağı aydın idi. Biz isə komandamızdan, heç olmasa, 1 xal gözləyirdik.

"Football-plus.az" xəbər verir ki, ilk 15 dəqiqə əsasən meydanın mərkəzində getdi. 17-ci dəqiqədə Elvin Ramili qapıçıyla üzbəüz çıxarsa da, Şlager daha cəld tərpənərək topu uzaqlaşdırdı. Qriliçin iti bucaq altından zərbəsi isə qapıdan yan keçdi. Şmidin həmləsi də eyni cür alındı. Ksaver Şlagerin zərbəsi isə qapının üstündən keçdi. Ksaver ilk yarının ən yaxşısıydı desək, yanılmarıq. 38-ci dəqiqədə Eminin cərimə zərbəsi hədəfə düşmədi. Hissənin sonlarına doğru Toral müdafiəçilərdən əla sıyrılıb qapı önünə asma etsə də, Ramil bərbad zərbəylə komanda yoldaşının əziyyətini puç etdi. Yığmamızın heyətində Rahil diqqəti çəkirdi. "4 nömrə" həm müdafiədə etibarlı oynayırdı, həm də hücumların qurulmasında fəal iştirak edirdi. Komandalar fasiləyə qolsuz bərabərliklə yollansa da, qonaqların nisbi üstünlüyü hiss olundu.

Rəqib 2-ci yarıya üç dəyişikliklə başladı və bu addım dərhal effekt verdi. Oyuna yeni qoşulan Zabitser cərimə zərbəsini yerinə yetirərkən top Rahlin əlinə dəydi. Referi tərəddüt etmədən “nöqtə”ni göstərdi. Topa yaxınlaşan Zabitser Şahruddinə şans vermədi. Avstriyalılar qoldan sonra da fəallığını davam etdirdi. Baumqartnerin zərbəsini qapıçı dəf etdi. Qolkiperimiz Vimmerin sevinməsinə də imkan vermədi. Veberin zərbəsi isə çərçivədən yan keçdi. Yığmamızda Toral qol şansı qazansa da, onun iti bucaq altından zərbəsi qapının üstündən keçdi. Oyunun geridə qalan dəqiqələri meydan mərkəzində getdi. Nəhayət, 90+1-ci dəqiqədə meydanda inanılmaz epizod yaşandı. Musa-Mahir-Emil-Toral kombinasiyasının sonunda “Qarabağ”ın oyunçusu elə qol imkanını əldən verdi ki, oyunu izləyən azərbaycanlıların başını tutmaqdan başqa çarəsi qalmadı. Əslində bu anda qol vurmamaq vurmaqdan daha çətin idi. Hakimin final fiti qonaqların qələbəsini, deməli, həm də AÇ-yə vəsiqəni rəsmləşdirdi. Yığmamız Tallindəki uğurun davamını gətirə bilmədi. Heç şübhəsiz, oyundan dərhal sonra De Byazinin postunda qalmasının nə dərəcədə məqsədəuyğun olmasıyla bağlı müzakirələrin yeni dalğası başladı. Doğrudan da, məntiqli sualdı: onu bağışlamaq olarmı?

ABDULLA İSMAYILOĞLU