Meydan sahibləri oyuna fəal başladı.

Xalayla iki dəfə diqqət mərkəzinə düşsə də, qapıçıyla dueldən məğlub ayrıldı. Tettehin cəhdi isə uğursuz alındı. Allaşın sevinməsinə də qolkiper imkan vermədi. “Qəbələ” ardıcıl qol imkanlarından yararlana bilməyəndən sonra naxçıvanlılar təşəbbüsü ələ aldı. Rodrigesin cərimə zərbəsinə Rəşad seyvlə cavab verdi. Kurdiçin başla zərbəsi hədəfə düşmədi. "Qəbələ" buna Xalaylanın iti bucaq altından zərbəylə cavab versə də, Avram səddini keçə bilmədi. 32-ci dəqiqədə Turan qüvvətli cərimə zərbəsiylə hesabı açdı. Amma qonaqların sevinci çox çəkmədi. 37-ci dəqiqədə Allaşın zərbəsini Avram qaytarsa da, özünü çatdıran Tetteh topu tora göndərdi. Bir qədər sonra Kadirinin zərbəsi dirəkdən qayıtdı, onun təkrar cəhdi isə qapıdan yan keçdi. 45-ci dəqiqədə Kadirinin uzaqdan möhtəşəm zərbəsi qarşısında Rəşad aciz qaldı. Naxçıvanlılar ilk yarını həm hesabda, həm də də say baxımından üstün bitirdi. Kapitan İlkin Qırtımov hələ 28-ci dəqiqədə Kuzmanoviçə qarşı kobudluğa görə birbaşa qırmızı vərəqə ilə meydandan qovulmuşdu. 60-cı dəqiqədə Xalayla da komanda yoldaşının arxasınca yollanandan sonra oyunun taleyi müəyyənləşdi. 9 nəfərlə qalan “Qəbələ”nin “Araz-Naxçıvan”a nəsə edə biləcəyi inandırıcı görünmürdü. Belə də oldu. 69-cu dəqiqədə künc zərbəsinin ardından Maşike fərqi artırdı. 71-ci dəqiqədə Kuzmanoviç qapını yoxladı, qolkiper seyvlə cavab verdi. Hücumu davam etdirən Maşikenin qapı önünə zərbəyəbənzər asmasına yüksələn Kuzmanoviç fərqi artırdı. 4-cü qoldan sonra qonaqlar daha rahat oynayıb hesabı qorumaqla məşğul oldu. 81-ci dəqiqədə Allaşın cərimə meydançasına ötürməsinə Afriko ayaq qoyub fərqi azaltsa da, qol VAR-da yoxlanılandan sonra hesaba alınmadı. Referinin final fiti "qırmızı-qaralar"ın darmadağınını, "Araz-Naxçıvan"ın isə zəfərini rəsmləşdirdi.

Gözdən qaçmadı
* Oyun 16.30-da yox, 16.39-da başladı.
* Qarşılaşmanın startından fəal azarkeş kimi tanınan Elvin Əliyev Emil Səfərova dəstək şüarı səsləndirdi. Bir qədər sonra stadiona toplaşanlar da ona qoşuldu.
* 4-cü qoldan sonra "Qəbələ"nin prezidenti Fariz Nəcəfov və azarkeşlər stadionu tərk etməyə başladı.