Ötən tur səfərdə "Qarabağ"a uduzan "qırmızı-qaralar" doğma meydanda 3 xalı hədəfləyirdi.

"Zirə"nin bir gün əvvəl "Kəpəz"lə oyunda xal itirdiyini də nəzərə alsaq, mümkün qələbə Elmar Baxşıyevin komandasının Konfrans Liqasını yolunu daha da hamarlayacaqdı. Son oyunlarda inamlı çıxışıyla göz oxşayan, hətta "Neftçi"ni darmadağın edən "Turan Tovuz" isə uğurlu seriyanı davam etdirməyi düşünürdü.

Hakimin start fitindən sonra ilk həmlə qonaqlardan gəldi. Amma Runinin cərimə meydançasına asması zamanı Pusi fərqlənə bilmədi. İsnikdən gözəl ötürmə alan Santosun fərqlənməsinə dirək mane oldu. "Boz qurd"un cavabı da gecikmədi. Piruzi müdafiçilərdən aralanan Runini gördü. Forvard gözəl hərəkətlə qapıçından da sıyrılıb boş qapını nişan almaq istəsə də, son anda Qırtımov ayaq qoyaraq qola imkan vermədi. Bir qədər sonra Məqsəd cərimə zərbəsindən hədəfə düşmədisə, İsnikin sevinməsinə qapıçı imkan vermədi. Hissənin sonlarına yaxın Pusinin zərbəsini Səlahət dəf etdi və komandalar fasiləyə qolsuz yollandı.

İkinci hissəyə "Qəbələ" fəal başladı. Asifdən ötürmə alan Santos qapını yoxlasa da, Kamal əla reaksiya göstərdi. 54-cü dəqiqədə isə Marandicinin cərimə zərbəsindən qapı önünə asmasına Sadiq ayaq qoymaqla hesabı açdı. İrəliləyən dəqiqələrdə Marandicinin zərbəsini qolkiper tutdu. Xəyalın kornerdən asması zamanı isə Şəhriyarın başla zərbəsini Səlahət dəf etdi. Meydan sahibləri tədricən təşəbbüsü ələ aldı. Bunun məntiqli nəticəsi kimi də 66-cı dəqiqədə Santosun ötürməsini Utziq dəqiq tamamladı. Qoldan sonra da meydan sahibləri hücumları davam etdirdi. 73-dəqiqədə Utziq müdafiənin arxasına hiyləgər ötürməylə Santosu “görsə” də, “sambaçı”nının zərbəsi dirəkdən qayıtdı. Növbəti epizodda Santosdan ötürmə alan İsnikin iti bucaq altından zərbəsinə əvvəlcə qapıçı reaksiya göstərdi, sonra isə dirək qola mane oldu. "Qırmızı-qaralar" imkanları boşa verəndən sonra qonaqlar yenidən fəallaşdı. Divinenin iki zərbəsi “çərçivə”yə düşmədi. Runinin də cəhdi boşa çıxdı. 5-ci uzatma dəqiqəsində isə Ayxanın kornerdən asmasına yüksələn Siyanda oyunda son nöqtəni qoydu. "Qəbələ" şok məğlubiyyətlə "Zirə" ilə xal fərqini artırmaq şansını qaçırdısa, "Turan Tovuz" ardıcıl 3-cü qələbəsini rəsmləşdirdi.

Gözdən qaçmadı
* Qəbələyə çatarkən stadiona gedən yol bağlanmışdı. Buna səbəb Ermənistan silahlı qüvvələrinin təxribatının qarşısını alarkən şəhid olan hərbi qulluqçu Məhəmməd Qarayevin nəşinin gətirilməsi idi.
* Matçın startından öncə "Qarabağ-2"nin vəfat edən futbolçusu Şirxan Həsənzadənin və şəhid Məhəmməd Qarayevin xatirəsi birdəqiqəlik sükutla yad olundu.
* Oyunu izləyənlər arasında "Qəbələ"nin qızlardan ibarət U-17 komandası da vardı.
* 20-ci dəqiqədə Abu Akal zədələnərək meydanı xərəkdə tərk etdi.
* İlk hissə bitəndən sonra "Səbail"lə oyunda "Qəbələ"nin heyətində 100-cü matçını keçirən Murad Musayevə klubun idman direktoru Nail Kərimov üzərində “100” yazılan forma bağışladı.
* Elmar Baxşıyev Rafael Utziqi 79-cu dəqiqədə Ülvi İsgəndərovla əvəzləyərkən braziliyalı buna etiraz etdi və birbaşa paltardəyişmə otağına yollandı.
* 86-cı dəqiqədə Asif Məmmədov əzələsini dartaraq meydanı xərəkdə tərk etdi. Müayinə nəticəsində kapitanın mövsümü bitirdiyi bəlli olub.

ABDULLA İSMAYILOĞLU