Hakimin start fitindən sonra mübarizə əsasən meydanın mərkəzində getdi.

İlk hücum qonaqlardan gəldi. Amma Petkovun zərbəsini qapıçı dəf etdi. Meydan sahibləri buna Abbasla cavab versə də, müdafiçilər topu boş qapıdan çıxardı, Məqsədin təkrar zərbəsinə isə Tərlan yaxşı reaksiya verdi. 34-cü dəqiqədə Paxthmann gözəl ötürməylə Sumanı gördü, sonuncu dəqiq zərbəylə hesabı açdı. Hissənin sonlarına doğru Məqsədin cəhdi uğursuz oldu. "Qartallar" fasiləyə üstün yollandı. 2-ci yarıya qonaqların fəal başlayacağı gözlənilsə də, "Zirə" ehtiyatlı oyunla rəqibi topsuz qoymaqla məşğul idi. “Ev tapşırığı” zamanı Məqsədin zərbəsini qapıçı dəf etdi. Rəhimin zərbəsini isə müdafiəçilər boş qapıdan çıxardı.

Bundan sonra oyun yenə meydanın mərkəzində getdi. 70-ci dəqiqədən sonra qonaqlar ərazi üstünlüyünə sahib oldu. Bunun məntiqi nəticəsi kimi 74-cü dəqiqə Sərtanın cərimə meydançasına asması zamanı Qismət topu uzaqlaşdırarkən səhvə yol verdi. Bundan istifadə edən Marandiçi hesaba tarazlıq gətirdi. Amma tovuzluların sevinci uzun sürmədi. 77-ci dəqiqədə “Zirə”nin kapitanı cərimə zərbəsini dəqiq yerinə yetirməklə həm Tərlanı məyus etdi, həm də komandasını önə çıxardı. Oyunun sonlarına doğru Ayxanın həmləsinə Tyaqo gözəl seyvlə cavab verdi. Rəhimin zərbəsini isə müdafiəçilər boş qapıdan çıxardı. Qalan dəqiqələrdə də "Zirə" yığcam müdafiə olunaraq Tovuz təmsilçisinə qol imkanı yaratmağa imkan vermədi. Referinin final fiti qəsəbə təmsilçisinin qələbəsini, "Turan Tovuz"un isə ardıcıl 2-ci məğlubiyyətini rəsmləşdirdi.

Gözdən qaçmadı
* Oyundan öncə sentyabrın ən yaxşı qolunu vuran "qartallar"ın oyunçusu Məqsəd İsayevə 1000 manat mükafat və hədiyyələr təqdim olundu.
* Matçın startına sayılı dəqiqələr qaldığı vaxtda İlqar Qurbanova “skay- boks”da əyləşməyə imkan verilmədi. Belədə veteran futbolçu etiraz edərək "biz hansısa küçədən keçən futbolçu olmamışıq ki, belə hörmət göstərəsiz. Mən ölkə futbolu üçün can qoymuşam. Bu necə hörmət- ehtiramdı" dedi. Onun bu çıxışından sonra yığmanın köməkçi məşqçisi Arif Əsədov da “skay-boks”da yox, qonaqlar üçün lojada əyləşdi.
* Oyunboyu tovuzlu azarkeşlər baş məşqçi Ayxan Abbasova dəstək xarakterli şüarlar səsləndirdikləri halda, referi İnqilab Məmmədovun ünvanına qeyri-etik ifadələr yağdırdılar.

ABDULLA İSMAYILOĞLU