"Araz-Naxçıvan" premyer-liqaya qayıdışı və çıxışı kimlərisə təəccübləndirdi. Buna rəğmən, biz adımıza yaraşan mübarizlik göstərəcəyinə inanırdıq. Öz payıma deyim ki, komandanın yaradıcı oyunla çoxlarına baş ağrısı olacağına gözləyirdim. Təbii ki, bu uğurda əsas pay sahibi baş məşqçi Azər Bağırovdu. Onun 10 ilə yaxındı Pro kateqoriyasına sahib olmasına rəğmən, elita təcrübəsi yox idi. Mütəxəssis daha çox 1-ci liqada uğurlarıyla seçilirdi. Təbii ki, ötən mövsüm "Araz-Naxçıvan"ı çempion etməsini də böyük uğur saymalıyıq. Geridə qalan 9 oyuna nəzər yetirəndə görürsən ki, Azər müəllim premyer-liqada baş məşqçi kimi işinin öhdəsindən artıqlamasıyla gəlir. Komandanın uğuruyla bağlı daha bir simanın adını çəkməyi özümə borc bilirəm – bir il əvvəl komandanı yenidən formalaşdıran, inkişaf etdirən keçmiş prezidentimiz Vüqar Abbasovun. Odu ki, Vüqar bəyin xidmətlərini də danmaq olmaz. Hazırda "Araz-Naxçıvan"la çalışmasam da, azarkeş kimi onun yanındayam və uğurlar arzulayıram".