Misli premyer-liqasının 9-cu turunda “Qarabağ” səfərdə “Neftçi”ni məğlub etdi – 0:2.
Oyun zamanı və oyundan sonra yaşanan hadisələr səs-küy doğurdu. Belə ki, artıq 3-cü dəqiqədə polislər “Forza Neftçi”yə pankart açmağa icazə vermədiyi üçün fanatlar arenanı tərk etdilər. Pankartda yazılan cümlə isə olduqca sual doğurdu: “Əziz bakılılar və şəhərimizin qonaqları”. Bəs görəsən, “Neftçi” azarkeşlərinin bu pankartı açmaqda məqsədi nə imiş? Bu sualı fan-klubun fəal üzvlərindən biri olan Ramil Tarverdiyevə ünvanladıq:
“Belə pankartlar futbolun bəzəyidi. Bizim rəqib azarkeşlərlə heç bir problemimiz yoxdu. Və qarşı tərəfi nə təxribata çəkmək, nə də təhqir etmək kimi bir istəyimiz olub. Mənim “İmarət Tayfa”da bir neçə yaxın dostum da var. Belə şeylər o vaxt “Xəzər Lənkəran”la qarşılaşmalarda da olurdu. Yadınızdadısa, “Qarabağ” azarkeşləri 3-4 il əvvəl təhqir yazısı olan pankart açmışdılar. Hər komandanın fanatları rəqibə “ilişmək” üçün belə addımlar atırlar. Bunu böyütmətə ehtiyac yoxdu. Məqsədimiz pis deyil. Son açdığımız pankart barədə əvvəlcədən “Neftçi” rəsmilərinə də məlumat vermişdik. Düzdü, biz arenanı tərk edəndən sonra geri çağırdılar. Lakin artıq gec idi. Biz azarkeşlər həmişə “Neftçi”nin yanındayıq və sona qədər də belə olacaq”.
CAVİD ƏLİYEV