"Belə mötəbər yarışı ərsəyə gətirmək asan deyil. Təşkilatçıların əməyini yüksək qiymətləndiririk".

"Football-plus.az" xəbər verir ki, bunu Beynəlxalq Şahmat Federasiyasının (FIDE) prezidenti Arkadi Dvorkoviç Bakıda keçiriləcək Dünya Kubokuna həsr olunmuş mətbuat konfransında deyib.

Rusiyalı funksioner bildirib ki, gözəl şərait yarış ərzində təmin ediləcək: "Əminəm ki, şahmatçılar öz qabiliyyətlərini nümayiş etdirə biləcəklər. İnanıram ki, turniri izləyənlər zövq alacaqlar".

O, Maqnus Karlsenin Dünya Kubokundakı şanslarını da dəyərləndirib: "Teymur Rəcəbovdan fərqli olaraq, Karlsen Dünya Kubokunu qazanmayıb. Rəqabət çox ciddi olacaq. Maqnusun bu turnirdə qalib gələcəyinə zəmanət yoxdur. İddiaçılar Turnirində iştirakı isə onun özündən asılıdır. Maqnusla bu barədə danışmamışıq".

Qeyd edək ki, iyulun 30-da start götürəcək yarışda 80-dən çox ölkədən 206 kişi və 103 qadın şahmatçı mübarizə aparacaq. Görüşlər “Bulvar Marriot” otelində oynanılacaq. Yarışlar hər gün saat 15.00-da başlayacaq.