“AFFA-nın final oyununu Tovuza salması şimal bölgəsinə, “Qusar” azarkeşinə münasibətdə ədalətsizlikdi. Dünən köhnə Xudat kəndində keçirilən rayon birinciliyinin oyununa baxırdıq. Stadionda 1000-dən çox azarkeş var idi. Hamı finalın Tovuza salınmasından narazıdı. Bakıda, Sumqayıtda bu qədər stadion olduğu halda, matçın qərb bölgəsində keçirilməsi absurddu. “ASK Arena”da keçirilən yarımfinalda 700-dən çox azarkeşimiz tribunada yerini tutmuşdu. Finalda komandanı dəstəkləmək istəyənlərin sayı 2000-dən çox olacaq. Bu qədər azarkeşi Tovuza yollamaq böyük məsuliyyət tələb edir. Sabah onların başına yolda hansısa hadisə gəlsə, AFFA bunun altından necə çıxacaq? Niyə turniri təşkil edənlər belə nüansları nəzərə almır? Sizin vasitənizlə onlara müraciət edirik. Hələ final qarşılaşmasının vaxtı dəqiqləşməyib. Yaxşı olardı ki, həlledici görüş ya paytaxta, ya da ona yaxın yerə dəyişdirilsin”.

"Final matçının hansı şəhərdə keçiriləcəyi ilə bağlı qərar açıqlanarkən finalçılar bəlli deyildi. Biz həmişə həlledici görüşün hansı bölgədə, stadionda keçirilməsini 1/4 və ya yarımfinal oyunları ərəfəsində elan edirik. Belə yanaşma da beynəlxalq praktikaya əsaslanır. Dünyanın istənilən peşəkar, həvəskar çempionatları belə edir. Final qarşılaşmasını bölgələrdə təşkil etmək futbolu rayonlarda populyarlaşdırmaq baxımından stimullaşdırıcı tədbirlərdəndi. Futbol məkanını seçərkən oyunun keçirilməsiylə bağlı stadionların minimum standartları nəzərə alınır. Son iki mövsümdə final matçları Şamaxı şəhər stadionunda keçirilmişdi. Bu dəfə isə Tovuzda həlledici oyunu təşkil etməyi qərara aldıq. Dediyim kimi, final qarşılaşmasının harda keçirilməsiylə bağlı qərar veriləndə hələ finalçıların adına aydınlıq gəlməmişdi".