Bu gün dünya futbolunun əsas ulduzlarından biri də Erlinq Holanndı.

“Football-plus.az” xəbər verir ki, “Mançester Siti”nin norveçli forvardı mayın 3-də mövsüm ərzində vurulan qol sayına görə İngiltərə premyer-liqası üçün yeni rekord müəyyənləşdirdi. “Vest Hem”in (3:0) qapısına yol tapan Erlinq 35-ci qolunu vurmaqla Endi Koulla Alan Şirerin göstəricisini arxada qoydu.

Əlbəttə, “Siti” rəhbərliyi də Holannı yüksək dəyərləndirir, o, klubun ən yüksək ödənişli futbolçuları siyahısında ikincidi. Erlinq həftəyə 433 min, ilə təxminən 22,5 milyon avro qazanır. Ondan artıq qazanan yeganə futbolçu Kevin de Bruynedi – həftəyə 462 min, ilə 24 milyon avro.
Təbii ki, belə yüksək qazanc Holanna futbol meydanından kənarda da həyatın ləzzətlərindən dadmaq imkanı verir. Bombardir bahalı saat markası “Rolex”in vurğunudu, həmçinin geniş və bahalı avtoparkı var.

Rolls-Royce Cullinan
Holannın kolleksiyanın ən baha təmsilçisinin qiyməti 350 min dollardı. “Rolls-Royce Cullinan” avtomobilinin uzunluğu 5,3, eni 2,1, hündürlüyü 1,8 metrdi. 6,75 litrlik maşının çəkisi 2,6 ton olsa da, bu məqam onun 250 km/saat sürət yığmasına mane olmur. Bu maşından “Əl-Nəssr”in forvardı Kriştiano Ronaldo ilə boksçu Endi Ruisin də qarajında var. Avtomobil sahəsi üzrə ixtisaslaşan ekspertlərin fikrinə görə, “Rolls-Royce”un bu modelini Yaxın Şərqin neftlə zəngin ölkələrində şeyxlər çox sevir.

Range Rover Sport
“Range Rover Sport” İngiltərə çempionatında çıxış edən futbolçular arasında sevilən nəqliyyat vasitəsi və öz sinfində ən yaxşılardandı. Maşının qiyməti təxminən 150 min dollardı. Maşında masaj oturacaqları və “Meridian” audiosistemi quraşdırılıb. Cip 4,3 saniyə ərzində 100 km/saat sürət yığır, maksimal sürətini 280 km/saata çatdıra bilir. “Range Rover Sport” Devid Bekhemin, Cessi Linqardın, Qaret Beylin, Lük Şounun və bir çox başqa futbolçunun qarajında yer alıb.

Audi RS6 Avant
Qiyməti 150 min dollar olan Almaniyanın idman maşını markası Holannın avtoparkının ən sevimli fiqurudu. Norveçli Dortmund “Borussiya”sında çıxış edərkən qırmızı rəngli modeldə gəzirdi. İndi isə Mançesterdə dəbdə olan “Carbon Black” modelini sürür. “Audi RS6 Avant” 4,4 saniyəyə 100 km/saat sürət yığır, maksimal sürəti 280 km/saatdı. Lionel Messi, Luis Suares və Jerar Pike də şəxsi avtomobil kimi məhz bu markadan yararlanırlar.

Mercedes-AMG GLE
Kupe tipli maşının qiyməti 115 min dollardı. “Mercedes-AMG GLE” bu sinifdən olan ən ucuz maşındı. “Şəhərlilər”in hücumçusu bu modelə daha çox salonunun genişliyinə və rahatlığına görə üstünlük verir. Qabaritləri böyük olan norveçli hər gün məşqə məhz “Mersedes”lə gedir. “AMG GLE” 100 km/saatı cəmi 3,8 saniyəyə yığır. Almaniya istehsalı olan bu marka Ronaldo, Məhəmməd Salah və Ekter Belyerinin də istifadəsində var.