"Sumqayıt" - "Şamaxı" matçının iştirakçılarından biri də Amil Yunanov idi.

“Football-plus.az” saytı olaraq forvardla 0:1 hesabı ilə uduzduqları oyun, zədəsini sağaltması, komandasının çıxışı və başqa suallar ətrafında söhbət etdik.

- Qarşılaşma ilə bağlı təəssüratın maraqlıdı...

- Çox çətin səfərə gəlmişdik. "Sumqayıt"ın qələbə üçün “diş göstərəcəyini” bilirdik. Ona görə də matça son dərəcə ciddi hazırlaşıb meydanı qalib tərk etmək istəyirdik. Düşünürəm ki, rəqibdən üstün oynadıq, sadəcə, epizodları qola çevirə bilmədik. Bu gün oyun planında rəqibi üstələsək də, məğlub olduq.

- Premyer-liqanın 5-ci turunda zədələnərək sıradan çıxmışdın. Və yalnız çempionatın 2-ci yarısında oynamağa başladın. Əvvəlki formanı bərpa edə bilmisən?

- Təəssüf ki, zədə səbəbindən 13 tur buraxmalı oldum. Hazırda formamı bərpa etməklə məşğulam. Oyundan-oyuna buna nail olacağıma inanıram. Əvvəlki 3 matçda meydana sonradan çıxdım. Bu gün isə start heyətində çıxış etdim. Düşünürəm ki, gələcəkdə daha çox oynamaq şansı qazanacam.

- Heyətdə təcrübəli futbolçular azdı. Komandanın ən təcrübəlisi və əsas kapitanı Elvin Məmmədov da zədə səbəbindən bir müddət kənarda qaldı. Necə düşünürsən, onun yoxluğu çox hiss olundu?

- Əlbəttə, Elvinin olmaması işimizi xeyli çətinləşdirmişdi. Artıq o da zədəsini, demək olar, sağaldıb. Şükürlər olsun, bugünkü matçımızda kapitan da 11 dəqiqə bizə kömək etdi. Əminəm ki, formasını bərpa etdikdən sonra o da çox şans qazanacaq. Elvin kimi təcrübəli futbolçuya həm məşqlərdə, həm də matçlarda çox ehtiyacımız var.

- Elvin Məmmədovun yoxluğunda Rəşad Əzizli kapitan kimi işinin öhdəsindən gəlir?

- Rəşad həm azsaylı təcrübəli futbolçularımızdandı, həm də ikinci kapitandı. Təcrübəsi və liderliyini maksimum meydanda sərgiləməyə çalışır. Amma Elvini daha çox kapitan kimi görməyə öyrəşmişik. Rəşad əsasən arxa xətdə dayağımızdı. O qapıda dayananda daha rahat oluruq. Elvini isə meydanın hər yerində görürük. Göstərişlər verməklə oyunçular arasında rabitə yarada bilir. Həm komanda şəklində müdafiə olunmaqda, həm hücumların qurulmasında, həm də standart vəziyyətlərdən istifadə zamanı fəaldı.

- Hücum xəttində “dişsizlik” hiss olunur...

- Komandamızda nominal hücumçu mən və Kamrandı. Zədəyə görə 13 oyun kənarda qaldım. Əsas güc Kamranın üzərinə düşmüşdü. Gənc olmasına rəğmən, irəlidə çox qaçır, döyüşür. Bəzən vingerlərimiz Bahadurla Qurban da forvard kimi çıxış edir. İnanıram ki, qarşıdakı oyunlarda hücumda daha yaradıcı olmaqla qollar vurub komandamıza vacib xallar qazandıracağıq.

ABDULLA İSMAYILOĞLU