Premyer-liqanın 32-ci turunun "Qəbələ" - "Səbail" oyununda meydan sahiblərərinin heyətində özünü yaxşı tərəfdən göstərənlərdən biri də Asif Məmmədov idi. Kapitan komandasının ilk qolunda Maçadoya məhsuldar ötürmə verməklə yanaşı, orta sahədə yaxşı mübarizə aparmaqla İsnik Aliminin yoxluğunu da hiss etdirmədi.

"Football-plus.az" olaraq "Qəbələ"nin təcrübəli futbolçusu ilə oyun və başqa mövzular ətrafında danışdıq.

- Ağır oyun keçdi. Düşüncələrin maraqlıdı...
- Oyun istədiyimiz kimi başladı. İlk hissədə diqtə edən tərəf idik. Amma 3 top fərqiylə irəli çıxandan sonra bir qədər arxayınlaşdıq. Rəqib də bundan istifadə edərək təzyiqi artırdı və 2 qol vurdu. Oyun ritmimizin itməsi bizə baha başa gələ bilərdi. Əsas odu ki, qələbə qazana bildik. Səhvlərimiz barədə, yəqin ki, məşqçilərimiz irad və göstərişlərini bildirəcək.

- Səni əsasən pleymeyker mövqeyində görmüşük. Aliminin yoxluğunda isə "Səbail"lə qarşılaşmada dayaq yarımmüdafiçisi kimi oynadın. Çətin olmadı?
- Mənim üçün yeni mövqe deyil. Aliminin mövqeyində mövsümün əvvəlində, həmçinin karyeram boyunca kifayət qədər oynamışam.

- Tez əvəzlənməyinin səbəbi nə idi?
- 3-4 gün idi xəstəydim. Hesab 3:0 olanda həddən artıq yüklənməməyim üçün əvəzləndim. Yaxşı ki, əvəzləndim, çünki yorğunluq hiss etdim.

- Sirr deyilsə, nə xəstəliyi idi?
- Hazırda gəzən virus üzündən soyuqlamışdım.

- Qarşıda 4 ağır tur var. Nəyə köklənmisiz?
- 7-8 tur əvvələ nəzər salsaq, deyərdik ki, taleyimiz rəqiblərimizdən asılıdı. Amma kuboku da nəzərə alsaq, son 6 məğlubiyyətsiz oyundan sonra 4-cü yerdə qərarlaşmışıq. Hazırda taleyimiz özümüzdən asılıdı. Ona görə də bizim üçün aktual məsələ nəyin bahasına olur-olsun, 4-cü pillədə möhkəmlənməkdi.

- Kubokun finalında cəza üzündən oynamayacaqsan. Bu səni məyus edir?
- Əlbəttə, məyusam. Bəlkə də mövsümdə ən böyük məyusluğum "Neftçi"ylə final matçını buraxmağım olacaq. İnanıram ki, komandam rəqibi üstələyib məyusluğumu aradan qaldıracaq.

- 4-cü yerdə möhkəmlənməklə yanaşı, kuboku da götürəcəyinizə inanırsan?
- Final oyununa yetərincə vaxt var. İndidən nəsə demək olmaz. Hazırda yaxşı formadayıq. Amma 1 ay sonra necə olacağını bilmirik. Mövsümün sonudu, yorğunluq, məzuniyyət, yaxınlar üçün darıxmaq və başqa belə hallar var. Ona görə hələ əsas diqqətimizi çempionata kökləmişik.

ABDULLA İSMAYILOĞLU