Selyuk afrikalıların lənətini “Siti”dən götürdü
Çempionlar Liqasının yarımfinalının “Real” – “Mançester Siti” oyunundan öncə tanınmış rusiyalı menecer, bir dönəm Yaya Turenin maraqlarını qoruyan Dmitri Selyuk diqqətçəkən açıqlama verib.
"Football-plus.az" xəbər verir ki, o, afrikalı şamanların mançesterlilərə qarşı lənətini xatırlayıb və artıq bu lənətin aradan götürüldüyünü bildirib:
“İlk növbədə bu hadisəyə görə üzr istəyirəm. Artıq bu söhbətə son qoymağın zamanı çatıb. Fikrimcə, Ture də mənimlə razılaşar. O da “Mançester Siti”yə uğurlar arzulayır. Şamanlar artıq lənəti klubun üzərindən götürüblər və bundan sonra “Siti” Xosep Qvardiolanın dönəmində ÇL-i qazana biləcək. Bu mövsüm onların şansı yetərincə yüksəkdi. Bu mövsüm olmasa belə, qarşıdakı illərdə mütləq bu titulu qazanacaqlar. Xatırlayırsızsa, bir dəfə “Siti”ni Tureyə ad günündə tort hədiyyə etmədiklərinə görə tənqid etmişdim. Bu ay mənim də ad günüm olacaq. Mənim onlara hədiyyəm lənətin aradan gətürülməsidi. Əslində onların bu mövsüm hətta trebl qazanacaqlarını düşünürəm”.
Məsələyə Yaya Ture də münasibət bildirib:
“Mətbuatın sabiq menecerimin lənət haqda dediyi sözlərə bu qədər yer ayırması mənə qəribə gəlir. Xahiş edirəm, məni bu axmaq söz-söhbətdən və miflərdən uzaq tutun. Mətbuat daha maraqlı və ciddi şeylərdən yazmalıdı. Bu insanla mənim artıq heç bir əlaqəm yoxdu. Belə mifləri qabartmaq lazım deyil”.
Məsələnin kökü Turenin “Siti”dəki son mövsümünə - 2017/18-ə gedib çıxır. 2010-dan klubda olan kot d`İvuarlı yarımmüdafiəçinin Xosep Qvardiola ilə münasibətləri pozulmuşdu. 2010-dan etibarən klubda olan Ture həmin mövsüm premyer-liqada cəmi 1 oyunda start heyətində meydana çıxdı. Qaradərili futbolçünün meneceri olan Selyuk tez-tez Qvardiolanı sərt şəkildə tənqid edirdi və onu bilərəkdən Tureni oynatmamaqda günahlandırırdı. Məşhur futbolçu 2018-in yayında “Siti”ni tərk etdikdən sonra isə Selyuk bunları demişdi: “Allah hər şeyi görür. Klubun əfsanəsinə münasibətdə belə davranmaq olmaz. Qvardiola bütün Afrikanın nifrətini qazandı. Afrikalıların hamısı “Siti”dən üz döndərib. Hətta bir çox afrikalı şamanlar klubu lənətləyərək gələcəkdə Qvaridolaya ÇL-i qazanmağa imkan verməyəcəklər. Mənim haqlı olub-olmadığımı zaman göstərəcək”. Elə Ture özü də ilk vaxtlar Qvardioladan möhkəm inciyərək onu “Qvardiola meydanda eyni anda 5 afrikalı buraxdıqda ona tort göndərəcəm” sözü ilə tənqid etmişdi. Amma karyerasını bitirdikdən bir müddət sonra -2021-in aprelində bu sözlərinə görə peşman olduğunu bildirərək üzr istəmişdi:
“Qvardiola ilə böyük məmnuniyyətlə üzbəüz oturub söhbət edərdim. İndi tam başqa yolla irəliləyirəm. Futbolçu olduğum dönəmdə bir qədər eqoist idim. Ancaq öz maraqlarımı düşünürdüm. Artıq məşqçi olmaq istəyirəm. Ona görə də birlikdə işləyəcəyim futbolçuları başa düşməyə çalışmalıyam”. Ötən il “Siti” “Real”a qarşı yarımfinalda möcüzəvi şəkildə son anda ardıcıl qollar buraxaraq finala həsrət qalandan sonra Selyukun lənətlə bağlı dediyi sözlər yenidən gündəmə gəlmişdi. Elə o özü də böyük məmnunluqla jurnalislərə bu haqda açıqlama vermişdi: “Mən Qvardiolanın artıq ÇL-i qazana bilməyəcəyini hələ 2018-də demişdim. Düzdü, şaman deyiləm. Amma bu işlərin necə qurulduğunu bilirəm. Son dəqiqəyə hesabda öndə daxil olursansa və 2 top buraxıb uduzursansa, deməli, bəzi şeylərin üzərində düşünmək lazımdı. Uzun illər afrikalılarla işləmişəm. Onlar məni gözəl tanıyır, mən də onları. Yaxşısı budu, afrikalıların xətrinə dəyməyəsən”.
Digər xəbərlər
