Yuri Vernidubun gəlişindən sonra “Neftçi”nin aparıcı oyunçularından birinə çevrilən Freddi Varqasın durumundan xəbərdarsınız. Venesuelalı cinah yarımmüdafiəçisinin transfer hüququna malik olan Netanya “Makkabi”sinin “ağ-qaralar”dan 900 min manat tələb etdiyini yazmışdıq.

Daha bir həftə ötdü. Hələ də Varqasdan xəbər yoxdu. “Neftçi”nin paytaxtda keçirdiyi təlim-məşq toplanışında da venesuelalı iştirak etmir. Onun müqaviləsinin müddəti bu ayın 30-u başa çatacaq. Klubun mətbuat katibi Asəf Zeynallı bizə Varqasla bağlı yeniliyin olmadığını söylədi. Məlum olan budu ki, “Neftçi” “Makkabi”yə həmin pulu vermək istəmir, İsrail klubu isə növbəti icarə variantının əleyhinədi.

Ötən mövsüm keçirdiyi 32 matçda 5 qol, 8 məhsuldar ötürmə müəllifi olan Varqası itirmək bakılılar üçün yaxşı heç nə vəd etmir. “Neftçi” Konfrans Liqasında irəliləmək istəyirsə, onu əldən buraxmamalıdı.

İSRAYIL XEYRULLAYEV