Ulduz futbolçunun ''Beşiktaş'' karyerası bitdi?
''Beşiktaş''ın mövsümün əvvəlində böyük ümidlərlə ''Everton''dan icarəyə götürdüyü Dele Allini çox güman artıq Türkiyə çempionatında görməyəcəyik.
“Football-plus.az” xəbər verir ki, bir neçə gün öncə ingiltərəli yarımmüdafiəçi klubdan icazə alaraq zədəsini sağaltmaq üçün vətəninə yollanmışdı. Amma məlum olub ki, Allinin zədəsi gözləniləndən ciddidi və onun üçün mövsüm başa çatıb. Bu barədə futbolçu özü sosial şəbəkədəki paylaşımında məlumat verib. Dele Allinin həm də ''Beşiktaş'' fanatlarına təşəkkür etməsi onun klubdan ayrılması kimi qiymətləndirib:
''Təəssüf ki, mənim üçün mövsüm başa çatdı. Klubda olduğum müddətdə mənə göstərdikləri sevgi və dəstək üçün ''Beşiktaş'' fanatlarına təşəkkür edirəm. Son həftələr mənim üçün çətin keçdi. Artıq diqqətimi tamamilə sağalmağa yönəltmişəm. Sosyallaşmaya bir müddət ara verəcəm. Yaxşılaşıb var gücümlə qayıdacam. Yaxınlarda görüşənə qədər''.
''Beşiktaş'' indiyə qədər Allinin daimi transfer edilməsi üçün ''Everton''a heç bir təklif irəli sürməyib və bu andan sonra da bu mövzuda yenilik olacağı gözlənilmir. Bir neçə il öncə ''Tottenhem''də az qala superulduz səviyyəsinə yüksələn, dəyəri 100 milyon avro olan 26 yaşlı futbolçunun sürətli enişdə olan karyerasını Türkiyədə ayağa qaldırmaq planı baş tutmadı. Heyətə düşməkdə çətinlik çəkən, oynadığı matçlarda da fərq yarada bilməyən Allinin ''Beşiktaş'' karyerası cəmi 15 rəsmi oyun və 3 qoldan ibarət oldu. Bir neçə gün öncə o, İngiltərədə şənləndirici qaz, yəni nitro oksid istifadə edərkən görüntülənmişdi.
Digər xəbərlər
