Bu gün saat 10-da AFFA İcraiyyə Komitəsinin (İK) iclası başlayacaq.

Qurumun saytının yaydığı məlumata görə, toplantıda əsas müzakirə mövzusu yığmanın AÇ-2024-ün seçmə mərhələsində keçirdiyi oyunlarla bağlı baş məşqçi Canni de Byazinin hesabatı olacaq. Bir də digər məsələlərlə bağlı danışılacaq.

Əvvəlcə başlayaq De Byazidən. Rəsmi açıqlama verilmişdi ki, italiyalı mütəxəssis Azərbaycana aprelin 17-də gələcək. Görəsən, necə oldu ki, bu proses tezləşdi? AFFA De Byazini buna məcbur etdi? Bu sualı qurumun Mətbuat və İctimaiyyətlə Əlaqələr Şöbəsinin rəhbəri Firuz Abdullaya ünvanladıq:

Əslində De Byazinin tez və ya gec gəlməsində hansısa prinsipal məqam yoxdu. Əsas odu ki, gəlir. Amma geriyə də bilet alıbmı?

İctimaiyyət De Byazidən narazıdı

Ölkə futbolu ilə maraqlananlar yığmanın AÇ-2024-ün seçmə mərhələsi çərçivəsində keçirdiyi ilk iki oyunun nəticəsi ilə barışa bilmir. Çünki komanda ümumilikdə qapısından 9 qol buraxdı. İctimaiyyət futbolçularla yanaşı, baş məşqçidən daha çox narazıdı. AFFA rəsmilərinin İTV-də yayınlanan “Sabaha saxlamayaq” verilişində suallara doğru-dürüst cavab verə bilməməsi, baş məşqçidən hesabat tələb etməli olduqlarını vurğulaması De Byazinin yola salınmasına işarə ola bilər. Yəni ümumi narazılığı nəzərə alan assosiasiya rəhbərliyi italiyalı ilə qarşılıqlı razılıq əsasında müqaviləyə xitam verə bilər.

Üç yerli namizəd

De Byazi gedəcəyi təqdirdə onu kim əvəzləyəcək? Əsas suallardan biri də budu. İndiki məqamda yığmanı müvəqqəti köməkçi məşqçi Arif Əsədova tapşırmaq olar. Onsuz da adı çəkilən mütəxəssis işin içindədi. Mediada daha iki namizədin hallanır. Söhbət “Kəpəz”in çalışdırıcısı Tərlan Əhmədovla “Zirə”nin baş məşqçisi Rəşad Sadıqovdan gedir. Maraq üçün qeyd edək ki, hər iki mütəxəssisin klubu ilə müqaviləsinin müddəti yayda bitəcək. Nəzərə alaq ki, yığma seçmə mərhələdə növbəti oyunu iyunun 17-də keçirəcək. Bu səbəbdən də AFFA adı çəkilən məşqçilərin biri ilə seçmə mərhələnin sonuna kimi anlaşa bilər. Yəqin ki, həm Əhmədov, həm də Sadıqov bu təklifə asanlıqla razılıq verər.

Kim real namizəddi?

Düşünmək olar ki, yuxarıda adı çəkilənlərdən ən real namizəd Arif Əsədovdu. Uzun illərdi komandanın içində olan mütəxəssis futbolçuları az-çox tanıyır. AFFA-dakılarla da əlaqələri yaxşı olan Arif bəyi baş məşqçi kimi də sınamaq mümkündü. Tərlan Əhmədov sıfırdan qurulan və pis vəziyyətdə olan komandalarda nəticə verməyi bacarır. Premyer-liqada ardıcıl 7 tur qələbəyə həsrət qalan “Kəpəz”in indiki performansı nəyə desən, dəyər. Lakin Tərlan bəydə ünsiyyət problemi var, futbolçularla yola getmir. Belədə İcraiyyə Komitəsinin üzvləri ona güvənə bilərmi? Buna cavab vermək çox çətindi. Eyni sözləri Rəşad Sadıqov haqda da söyləmək olar. Mütəxəssis üç ildi “Zirə”ni çalışdırır. Bu müddət ərzində ötən mövsüm uğurlu nəticələr əldə etdi. “Zirə” premyer-liqanın bürünc medallarına sahib oldu, ölkə kubokunun finalına vəsiqə qazandı. Bəlkə də AFFA rəhbərliyi bunu nəzərə alaraq millini Sadıqova tapşıra bilər. Lakin “Zirə”nin çalışdırıcısının futbolçularla yaşadığı problemlər, hakimləri ittiham etməsi, tez-tez milli ilə bağlı görülən işlərin səhv olduğunu dilə gətirməsi namizədliyini şübhə altına alır.

Heç kimin istəmədiyi qərar

Böyük əksəriyyət De Byazinin millidə qalmasını istəmir. Bu gün veriləcək ən pis qərar italiyalıya növbəti şansın tanınmasıdı. Bunu şərtləndirən əsas məqam ödəniləcək təzminatla bağlıdı. Ola bilər ki, AFFA rəhbərliyi italiyalıya pul vermək əvəzinə həmin vəsaiti ölkə futbolunun inkişafı üçün xərcləmək istəyində olsun. Məsələn, premyer-liqada və ya divizionda çıxış edən hansısa klubun maddi durumunu yaxşılaşdırsın. Məhz bu məqam nəzərə alınmaqla noyabrın sonuna kimi De Byazi ilə yola davam etməyə qərar verilə bilər. Bir sözlə, indiki məqamda italiyalının getməsi də pisdi, qalması da. İK üzvləri isə iki pis arasından yaxşını seçməlidi. Bacaracaqlarmı?

İLKİN SULTANLI