“Turan Tovuz” – “Şamaxı” oyununun sonunda yaşananlar artıq hər kəsə bəllidi.

Komandanın zəif rəqiblə oyundakı heç-heçəsindən narazı qalan yerli azarkeşlərdən bir qrupu Ayxan Abbasovu istefaya səsləyib. Baş məşqçi də oyunsonrası mətbuat konfransında “bilmirəm, yəqin bizi “3-lük”də görmək istəyirlər”, - deyə azarkeşlərə ironiya edib.

Mən məsələnin nəzəri tərəflərinə toxunmaq istəmirəm. Amma praktiki tərəf, daha dəqiqi, Əlahəzrət Statistika tovuzlu azarkeşin istefa istəməkdə tam haqlı olduğunu göstərir. Səbriniz çatırsa, rəqəmlərə baxaq.

“Turan Tovuz” cari mövsümdə 29 oyundan 15-ni evdə keçirib. Həmin oyunların statistikası isə belədi: 3 qələbə, 3 heç-heçə, 9 məğlubiyyət! Sən Allah, buna hansı azarkeş dözər?! Tovuz komandası üç qələbədən ikisini “Kəpəz”, birini “Sumqayıt” üzərində qazanıb. Ayxan bəy son iki pillədə qərarlaşan komandaları – “Şamaxı” ilə “Səbail”i evdə məğlub edə bilməyib.

Təbii ki, sevimli komandasını izləmək üçün stadiona gedən
azarkeş qələbə istəyir. Bölgələrdə bu tendensiya daha aydın duyulur. Çünki oralarda insanların başqa həyat sevinci yoxdu.

Yaxşı, sən 45 mümkün xaldan yalnız 12-ni (27 faiz) toplayırsansa və azarkeş də bu üzdən “istefa” qışqırırsa, niyə qəribəlik axtarırsan? Ayxan bəy, azarkeş heç də həmişə haqlı olmur. Amma lütfən, özünüzü tovuzluların yerinə qoyun. Evdəki 15 oyunun yalnız üçündə qələbə qazanan baş məşqçinin başını sığallayardızmı?

HUŞƏNG