Avropa Liqasının 1/8 finalında bu gün “Sevilya” ilə cavab oyununa çıxacaq “Fənərbaxça” ilə bağlı xəbərlər var.

"Football-plus.az" xəbər verir ki, sən demə, klubda 2-ci mövsümünü keçirən və əsas heyətə düşməkdə çətinlik çəkən Sərdar Dursunla “Fənərbaxça” arasında problem var imiş. Özü də bu, futbolda nadir hallarda rast gəlinən problemdi. İctimaiyyət bu hadisədən Türkiyə Futbol Federasiyasının nəzdində fəaliyyət göstərən Apellyasiya Komitəsinin (AK) srağagünkü rəsmi qərarından sonra xəbər tutdu. Komitənin bəyanatında qeyd olundu ki, Sərdar Dursunla “Fənərbaxça” arasındakı anlaşılmazlıqla bağlı Mübahisəli Məsələlərin Həlli üzrə Komitənin qərarı qüvvədə saxlanılır! Çox keçmədən türkiyəli həmkarlarımız məsələnin kökünü axtarıb tapdılar. Sən demə, Sərdar mövsümün əvvəllərində “Fənər”in məşqində istifadə olunan toplardan narazı imiş. O, hətta bununla bağlı “instaqram” səhifəsinin hekayə bölümündə paylaşım da edibmiş. Bu paylaşım sözügedən sosial şəbəkənin qaydalarına uyğun olaraq 24 saat sonra silinibmiş. Problem isə ondadı ki, Sərdarın bu hərəkəti “Fənərbaxça” rəhbərliyinin xoşuna gəlməyib və klubun daxili intizam təlimatnaməsinə uyğun olaraq 31 yaşlı futbolçuya 15 min avro cərimə kəsilib. Sərdar da tənbəllik etməyərək topun keyfiyyətini tənqid etdiyi üçün ona verilən bu cəza ilə razılaşmayıb və olayı Mübahisəli Məsələlərin Həlli üzrə Komitəyə daşıyıb! O bildirib ki, topu tənqid etməyə görə cəza verilməsi düzgün deyil və klubun təlimatnaməsində buna uyğun maddə yoxdu. Ancaq komitə hələ dekabrın 15-də qərarını verərək bu məsələdə “Fənərbaxça”nı haqlı sayıb. Daha doğrusu, Sərdarın paylaşımı idman etikasına zidd bir hərəkət kimi qəbul olunub. Dursun bu qərarla da razılaşmayaraq məsələni AK-ya daşıdı və göründüyü kimi, bu dəfə də belə desək, məğlub ayrıldı. Xatırladaq ki, ötən mövsüm “sarı-lacivərdlilər”in məhsuldar oyunçusu olan Sərdar Jorje Jezuşun gəlişindən sonra bir qədər gözdən düşdü. Onun adı avrokuboklarda mövsümlük iştirak ərizəsinə salınmadı. Klubla 2024-ə qədər müqaviləsi olan təcrübəli forvard bu mövsüm 18 rəsmi oyuna çıxaraq cəmi 3 qol vurub.

“Fənər”lə bağlı digər xəbər isə çətin ki, bu klubun fanatlarının xoşuna gəlsin. Belə ki, “Sevilya” ilə səfər matçının 82-ci dəqiqəsində zədələnərək əvəzlənən Linkoln Enrikenin durumu gözləniləndən ciddi imiş. Tibbi müayinə zamanı 24 yaşlı solaxay futbolçunun diz bağlarında yırtıq aşkarlanıb. Bu da o deməkdi ki, Linkoln artıq bu mövsüm meydana çıxa bilməyəcək. Ötən yay “Santa Klara”dan transfer olunan “sambaçı” universallığı ilə seçilirdi və Jezuşun ən çox güvəndiyi oyunçulardan idi. Son vaxtlar portuqaliyalı mütəxəssis Linkolnu müdafiənin solunda oynadaraq Fərdi Kadıoğlunu sağ cinaha çəkmişdi. Amma Linkolnun zədələnməsindən sonra “Sevilya” ilə cavab oyununda Fərdinin yenidən sol cinahda qərarlaşacağı, sağda isə Osayi-Samuelin oynayacağı gözlənilir. Linkoln Enrike bu mövsüm 35 rəsmi qarşılaşmada 2 qol, 8 məhsuldar ötürməlik performans sərgiləyib.