Jorje Jezuşun başçılığı altında hazırlığı davam etdirən ''Fənərbaxça''nın Avstriya toplanışı bir gün erkən başa çatdı.

"Football-plus.az" xəbər verir ki, komanda iyulun 1-də Qrats şəhərinə yollanmışdı və ayın 7-də, yəni bu gün vətənə qayıdacağı gözlənilirdi. Amma məlum olmayan səbəblər üzündən hazırlıq planında dəyişiklik baş verdi. Ayın 6-na planlaşdırılan ''Fehervar''la oyun ayın 5-də keçirildi və İstanbul nəhəngi dünən vətənə qayıtdı.

Xatırladaq ki, Macarıstan təmsilçisi ''Fehervar'' ''Qəbələ''nin Konfrans Liqasının 2-ci təsnifat mərhələsindəki rəqibidi. ''Merkur Arena''da keçirilən oyun ''sarı-lacivərdlilər''in 3:0 hesablı qələbəsi ilə yekunlaşdı. Komanda meydana Altay Bayındır, Osayi-Samuel, Kim Min Çje, Salai, Fərdi Kadıoğlu, İsmayıl Yüksək, İrfan Can Kahveci, Pelkas, Bruma, Rossi, Sərdar Dursun ''11-liy''i ilə çıxdı. Jezuş matçın gedişində qapıçı Altayla İsmayıl Yüksəkdən başqa bütün futbolçuları əvəzlədi. İstanbulluların qollarını 37-ci dəqiqədə Sərdar Dursun, 42-ci dəqiqədə Rossi və 61-ci dəqiqədə Valensiya vurdu. Amma qələbəyə baxmayaraq, 2 futbolçunun zədələnməsi əhval-ruhiyyəni korladı. Belə ki, hələ 12-ci dəqiqədə zədə alan Osayi-Samuel bir müddət oyuna davam etsə də, 31-ci dəqiqədə əvəzləndi. 63-cü dəqiqədə meydana çıxan yeni transfer Əmrə Mor isə cəmi 10 dəqiqə sonra əvəzlənməli oldu. Hər iki futbolçunun durumuna tibbi müayinədən sonra aydınlıq gələcək. Qeyd edək ki, Sərdar Əzizlə Migel Krespo zədəli olduğu üçün toplanışa aparılmamışdı. Mərt Hakan Yandaş isə toplanışın gedişində ağrılar hiss etdiyindən İstanbula erkən qayıtmışdı. Amma bu 3 futbolçunun iyulun 20-da Kiyev ''Dinamo''suna qarşı matçda Jorje Jezuşun ixtiyarında olacağı gözlənilir. Xatırladaq ki, ''Fənərbaxça'' bu hazırlıq dönəmində məğlub olmayıb. 5 oyundan 4 qələbə, 1 bərabərliklə ayrılan komanda növbəti yoxlama matçını iyulun 10-da Sakaryada Acun Ilıcalının sahibi olduğu ''Hall Siti''yə qarşı keçirəcək.