"Qarabağ"ın zəif çıxışının və mərhələ keçə bilməməsinin bir neçə səbəbi var. Əvvəla, yeni transferlər geç oldu. Bu üzdən hələ 90 dəqiqə oynamaq gücündə deyillər. Qurban müəllim bunu oyunsonrası mətbuat konfransında vurğuladı. Meydanda Kadinin, Ovusunun yeri görünürdü. Məhz braziliyalının gözəl ara ötürmələri, cərimə zərbələri və uzaqdan qapını yoxlamaları bizə çox lazım idi. Hələ ki bu sadalananları komadanda onun qədər edə bilənlər yoxdu. Rəqib də təmsilçimizi yaxşı təhlil etmişdi. Demək olar ki, "Qarabağ"a boş zona vermədilər. Hər iki komanda arxa xətdə maksimum ehtiyatlı olmağa çalışırdı. Fiziki cəhətdən Belçika təmsilçisi ikinci hisədə daha hazırlıqlı idi. "Gent" standart vəziyyətlər üzərində yaxşı çalışmışdı və qapımıza vurulan qol da "ev tapşırığı”nın nəticəsi idi. Zubirin oyunu da alınmadı. Rəqib futbolçular onu zərərsizləşdirirdi. Fransalı həddən çox driblinq edirdi. Bir neçə epizodda zərbə anını qaçırdı. Eyni sözləri Musa Qurbanlı haqda da söyləmək olar. Cicanın da meydanda nə etmək istədiyini anlamadıq. Ötürmə anında driblinq edir, zərbə anında ötürmə verir, qısası, düzgün seçim edə bilmirdi. Müasir futbola qapıya gözlənilməz zərbələr də yaraşıq verir. Hansı ki, bir çox hallarda qolla nəticələnir. "Köhlən atlar"ın ifasında uzaqdan və gözlənilməz zərbələr görmədik. Halbuki heyətdə bunu bacaran oyunçular var. Yankoviçin zədələnməsi də "Qarabağ" üçün təsirsiz ötüşmədi. Meydanın mərkəzindəki yaradıcı oyunu, irəlidəki futbolçuları topla təmin etməsi çox vacib idi. Kevin Medinanın da yoxluğu hardasa hiss olunurdu. Düzdü, Bədavi - Bəhlul tandemi yaxşı mübarizə apardı. Hər iki futbolçu arxa xətdə etibarlıdı. Lakin onlar daha çox dağıdıcılıqla diqqəti çəkir. Kolumbiyalı isə yeri gələndə yaradıcı kimi də göz oxşayır, hücum qurmağı üzərinə götürür, rəqib müdafiəsinin dərinliklərinə uzun, hiyləgər ötürmələr verir. Bəhlulun qol epizodunu da unutmayaq. Bəlkə zərbə tirdən qayıtmasaydı, qol olsaydı, oyunun axarı fərqli olardı. Ramil Şeydayev nə qədər meydanda qaçıb, döyüşsə də, istər son çempionat oyunlarında, istərsə də "Gent"lə hər iki qarşılaşmada sönük çıxışla yadda qaldı. Bakıda penaltini yerinə yetirə bilməmişdi. Futbolçuda sanki durğunluq var. Düzdü, istənilən futbolçu həmişə eyni səviyyədə çıxış etmir. Amma avrokubok matçı ərəfəsində özünü oyuna daha yaxşı kökləməliydi. Qısası, transferlərin gec həyata keçirilməsi, yeni qoşulanların tam arzulanan səviyyədə olmaması, Yankoviçlə Medinanın oyunu buraxması, hücumçuların və hücumameyilli futbolçuların zəif çıxışı, uzaqdan zərbələrin olmaması və rəqibin də təmsilçimizi yaxşı təhlil etməsi "Qarabağ"ın mərhələ adlaya bilməməsini şərtləndirdi. Artıq ağdamlılar bütün gücünü çempionat oyunlarına yönəldib izləyicilərindən bir qədər də uzaqlaşmağa çalışacaq. Həmçinin Qurban müəllim yeni transferlərin daha yaxşı formaya düşməsində maraqlı olacaq. "Qarabağ"a uğurlar arzulayıram".